Zubin Potok: tri gropa, fishekë dhe trupa të zhvendosur, si u tentua fshehja e krimit

Tri gropa në tokën e Zubin Potokut, njëra prej tyre e përdorur dikur si gropë gëlqereje, janë sot dëshmia më e drejtpërdrejtë e asaj që kryesuesi i Komisionit Qeveritar për Persona të Zhdukur, Agron Limani, e përshkruan si një përpjekje për të fshehur gjurmët e një krimi të kryer para më shumë se një çerek shekulli.

Limani ka bërë të ditur se në tri lokacione në Zubin Potok janë gjetur mbetjet mortore të 23 personave, të cilët dyshohet se janë zhdukur më 19 prill 1999. Sipas tij, kërkimet në këtë zonë kanë vazhduar për disa vite, ndërsa gjatë muajit të fundit u arrit identifikimi i saktë i tri pikave.

"Për fat të mirë dhe falë përpjekjeve disavjeçare për gjetjen e grupit të intelektualëve, janë identifikuar tri lokacione. Në lokacionin e parë, në Kalludër të Vogël, janë gjetur mbetje mortore të 13 personave, në të dytin, në Jabuqe, të katër personave, ndërsa në lokacionin e tretë të gjashtë personave. Janë mbetje mortore të 23 personave që janë zhdukur më 19 prill të vitit 1999", tha Limani në emisionin "Five".

Gjendja e mbetjeve në terren, sipas tij, ndryshon nga një pikë në tjetrën, dhe pikërisht ky ndryshim ngre dyshimet më të rënda. "Në njërin lokacion shihet që trupat janë të dekompozuar dhe të dëmtuar dhe krijohet përshtypja që varri primar nuk ishte aty, por kishte qenë diku tjetër dhe trupat ishin sjellë aty. Në lokacionin e dytë, te katër trupat, kishte edhe fishekë. Në atë vend janë ekzekutuar dhe varrosur. Edhe në lokacionin e tretë janë gjetur fishekë dhe municion", deklaroi ai.

Këto gjetje, thotë Limani, lënë të kuptohet se një pjesë e viktimave fillimisht mund të jenë varrosur diku tjetër dhe më pas janë zhvendosur me qëllim të fshehjes së krimit.

Terreni ku janë zhvilluar gërmimet mbetet, sipas tij, i rëndë për t'u parë. "Është e tmerrshme të shikosh relievin ku janë vrarë dhe janë varrosur njerëzit, deri ku ka shkuar çmenduria serbe. Pa informacione të tilla nuk do të mund të realizohej një gjetje e tillë", tha kryesuesi i Komisionit.

Zona tashmë është pastruar dhe konturet e varreve janë të dukshme. "Zona është pastruar dhe aty figurojnë tri gropa ku kanë qenë të varrosura mbetjet mortore. Njëra prej tyre është përdorur si gropë gëlqereje. Brenda dy-tri ditësh do të organizohet një vizitë aty", tha Limani.

Mbetjet mortore janë dërguar në Institutin e Mjekësisë Ligjore për procedurat e mëtejshme. Për rastin janë nën hetim tre persona, të identifikuar me inicialet J.R., M.J. dhe M.B., të dyshuar për veprën penale krime lufte kundër popullsisë civile dhe të ndaluar në masën e paraburgimit. Ata nuk janë shpallur fajtorë nga asnjë gjykatë. "Duhet të falënderojmë Policinë e Kosovës dhe të gjithë të tjerët për zbardhjen e të vërtetës. Këtij procesi i ka ndihmuar edhe arrestimi i tre të dyshuarve që akuzohen për krime lufte. Dyshohet që janë autorët e këtij krimi makabër. Çelësi, sipas organeve të sigurisë, është arrestimi i tyre", u shpreh Limani.