Akuza për 7.185 euro dëm në KEK bie: katër ish-zyrtarë shpallen të pafajshëm

Një kontratë riparimi në Korporatën Energjetike të Kosovës, e vlerësuar nga prokuroria si burim i një dëmi prej 7 mijë e 185 eurosh e 17 centësh, ka përfunduar pa asnjë dënim. Departamenti i Krimeve të Rënda i Gjykatës Themelore në Prishtinë ka marrë aktgjykim lirues ndaj katër të akuzuarve, duke i shpallur të pafajshëm për veprën penale "Keqpërdorimi i pozitës apo autoritetit zyrtar".

Të liruar nga akuzat janë Ramadan Shalaku, Adem Alshiqi, Lah Dedinca dhe Shefqet Kaqiu. Procesi gjyqësor kishte në qendër kontratën e KEK-ut për "Riparimin e punëtorisë elektro-makinerike me garderobë".

Sipas aktakuzës së Prokurorisë Themelore në Prishtinë, të ngritur më 25 mars 2024, Shalaku, në cilësinë e udhëheqësit në servisin e mihjes në KEK-Obiliq dhe menaxherit të kontratës, i kishte mundësuar operatorit ekonomik "Ar-Tech" Sh.p.k. përfitim financiar, ndonëse disa nga punimet e parashikuara me kontratë dyshohej se nuk ishin realizuar. Prokuroria pretendonte se këto veprime i kishin shkaktuar buxhetit të korporatës energjetike dëmin prej 7.185,17 eurosh.

Tre të tjerët përballeshin me akuzën në cilësinë e zyrtarëve që nënshkruan pranimin e punëve: Alshiqi si kryetar i Komisionit për pranim teknik, ndërsa Dedinca dhe Kaqiu si anëtarë të tij. Sipas prokurorisë, ata i kishin pranuar punimet e operatorit ekonomik, pavarësisht se një pjesë e tyre nuk ishte kryer ose ishte realizuar vetëm pjesërisht.

Të katër e kishin mohuar fajësinë që nga shqyrtimi fillestar dhe, pas përfundimit të procesit gjyqësor, janë liruar nga të gjitha pretendimet e aktakuzës.

Aktgjykimi nuk është i formës së prerë. Palët kanë të drejtë të ushtrojnë ankesë në Gjykatën e Apelit.