"Beteja vazhdon": Prokuroria ankohet pas lirimit të tre të akuzuarve për vrasjen e trefishtë në Gllogjan

Tre viktima, dy prej tyre nxënës 17-vjeçarë, dhe pesë vjet gjyq, kanë përfunduar në shkallë të parë me një lirim nga akuza. Gjykata Themelore në Pejë i ka shpallur të pafajshëm Halil Mehmetajn dhe dy djemtë e tij, Kreshnik e Kastriot Mehmetajn, për vrasjen e trefishtë në Gllogjan, ndërsa gjyqtari Leon Përlaska, kryetar i trupit gjykues, ka marrë vendim të veçantë për ndërprerjen e masës së paraburgimit ndaj të treve. Të tre ishin të pranishëm në sallë gjatë shpalljes së aktgjykimit.

Halil Mehmetaj është liruar nga akuza për shtytje në vrasje të rëndë, kurse Kreshnik dhe Kastriot Mehmetaj nga akuza për vrasje të rëndë në bashkëkryerje. Lirimi nuk ka qenë i plotë: për armëmbajtje pa leje, Halil Mehmetaj u dënua me tri vjet burgim dhe Kreshnik Mehmetaj me një vit burgim, secili veç e veç, ndërsa Kastriot Mehmetaj u lirua edhe nga kjo akuzë.

Prokuroria nuk e pranon vendimin. Prokurorja e rastit, Sahide Gashi, deklaroi pas seancës: "Beteja vazhdon. Kjo është vetëm shkalla e parë. Do t'i shkojmë deri në fund".

Sipas Prokurorisë, sulmi ndaj autobusit që transportonte nxënës nga shkolla kishte pasur si objektiv shoferin, i cili u vra bashkë me dy nxënësit 17-vjeçarë. Motivi i pretenduar ishte hakmarrja: organi i akuzës e lidhi vrasjen me vetëvrasjen, në vitin 2020, të bijës së Halil Mehmetajt, për të cilën familja Mehmetaj e kishte fajësuar shoferin. Sipas Prokurorisë, Halil Mehmetaj ishte betuar për hakmarrje te varri i vajzës, duke vendosur orën e tij të dorës në arkivol, ndërsa dy djemtë kishin planifikuar vrasjen dhe kishin ndarë detyrat për mënyrën dhe kohën e kryerjes. Asnjëri nga të akuzuarit nuk e ka pranuar fajësinë dhe të tre e kanë mohuar përfshirjen në vrasje gjatë gjithë procesit. Mbrojtja e ka cilësuar motivin e hakmarrjes si rezultat të një hetimi të gabuar dhe veprimesh të ngutshme, të bazuara, sipas saj, në spekulime dhe thashetheme fshati.

Kthesa vendimtare e këtij gjykimi ndodhi në ditën kur pritej fillimisht aktgjykimi, kur trupi gjykues vendosi ta rihapte shqyrtimin gjyqësor. Përlaska shpjegoi se Prokuroria, në fjalën përfundimtare, i ishte referuar një videoincizimi të Kreshnik Mehmetajt duke gjuajtur me armë në bjeshkë, pretendim që, sipas gjyqtarit, nuk ishte përmendur asnjëherë më parë. Prokuroria pretendoi se arma që shihet në video është arma me të cilën u krye vrasja. Gjyqtari theksoi se policia gjatë hetimeve e kishte kontrolluar pikërisht atë vend dhe se Agjencia e Forenzikës kishte ekzaminuar 13 gëzhoja dhe një plumb përmes ekspertizës balistike, por kjo provë nuk ishte paraqitur asnjëherë për administrim nga Prokuroria. Për sqarimin e këtyre rrethanave u mbajt edhe një seancë e posaçme, në të cilën prokurorja Gashi kishte thënë se e mirëpret dhe e respekton vendimin e gjykatës për rihapjen e shqyrtimit dhe administrimin e çdo prove që i shërben zbardhjes së së vërtetës materiale.

Gjatë gjykimit u dëgjuan edhe dëshmitë e prindërve të nxënësve të vrarë, Beqë Hamzaj dhe Florim Mustafaj. Hamzaj kishte thënë se vrasja e fëmijëve ishte bërë për ta mbuluar hakmarrjen dhe në seancë deklaroi: "Që pesë vjet i shoh vrasësit që ma kanë vra djalin. Komuna e Deçanit e din që këta ma kanë vra djalin. Këta janë dalë në krye me shkollim të Halilit". Gruaja e shoferit të ndjerë dëshmoi në një seancë të mbyllur për publikun për shkak të ndjeshmërisë së rrëfimit. Publiku ishte përjashtuar edhe kur dëshmuan Pranvera Halilaj dhe Rozeta Pjetraj, të cilat sipas Prokurorisë e vërtetojnë motivin e hakmarrjes, pasi rrëfimet e tyre prekën jetën personale të vajzës së ndjerë dhe të vetë të akuzuarve.