Zjarri në “Gate Club”: aktakuzë ndaj pesë personave, lokali u dogj për 3 mijë euro sipas Prokurorisë

Prokuroria Themelore në Prishtinë ka ngritur aktakuzë ndaj pesë personave për zjarrvënien e qëllimshme në lokalin “Gate Club”, në zonën industriale Prishtinë-Fushë Kosovë. Sipas aktakuzës së ngritur më 13 gusht 2026, lokali dyshohet se u dogj në këmbim të një shume prej vetëm 3 mijë eurosh, ndërsa dëmi material i shkaktuar arriti në 969 mijë e 435 euro.

Sipas Prokurorisë, dy të akuzuarit – SH.T. dhe Florim Sadiku, 37-vjeçar – ngarkohen me veprën penale “Zjarrvënia”. Tre të tjerët – B.H., I.M. dhe RR.A. – akuzohen për “Shtytje nga zjarrvënia”. Ndaj Florim Sadikut rëndon edhe një akuzë e dytë, ajo për “Pengimin e të provuarit apo procedurës zyrtare”.

Ngjarja, sipas aktakuzës, ndodhi më 14 shkurt 2025, rreth orës 04:53, në objektin e “Gate Club” në rrugën “Epiri”. SH.T. dhe Sadiku, në bashkëkryerje dhe pas shtytjes nga RR.A., dyshohet se i vunë zjarrin lokalit për shumën e lartpërmendur. Nga zjarri nuk pati persona të lënduar.

Rasti nuk është i vetmi që përfshihet në këtë aktakuzë. Sipas Prokurorisë, në periudhën nga shtatori deri më 16 nëntor 2025, B.H. dhe I.M. dyshohet se kanë shtyrë një person ende të paidentifikuar që t’i vinte zjarrin një automjeti “Range Rover” në pronësi të S.S., me motiv të dyshuar hakmarrjeje. Nga djegia e automjetit u shkaktua një dëm material prej 54 mijë e 892,72 eurosh.

Hetimet ishin zhvilluar nga Njësia e Hetimeve të Përgjithshme në Prishtinë, në koordinim me Prokurorin e Shtetit. Në korrik 2025 ishin arrestuar dy persona të dyshuar për zjarrvënien e lokalit, njëri prej të cilëve Florim Sadiku.

Prokurori i çështjes i ka propozuar Gjykatës Themelore në Prishtinë që, pas shqyrtimit gjyqësor dhe administrimit të provave, të pesë të pandehurit t’i shpallë fajtorë dhe t’i dënojë sipas ligjit. Të akuzuarit prezumohen të pafajshëm derisa fajësia të mos vërtetohet me vendim të formës së prerë të gjykatës.