Rrënime te Liqeni i Radoniqit: Pacolli niset vetë për të parë aksionin ndaj ndërtimeve pa leje

Buldozerët drejtohen te Liqeni i Radoniqit. Ministrja në detyrë e Mjedisit, Fitore Pacolli, njoftoi se Inspektorati Mjedisor do të rrënojë disa objekte pranë liqenit në Gjakovë, të cilat, sipas saj, "janë ndërtuar pa leje në pronën publike".

Pacolli tha se pronat publike do të lirohen nga "uzurpimet e paligjshme" dhe se aksioni nuk do të ndalet me këtë rast. "Aksioni ynë për vendosjen e ligjshmërisë anembanë Kosovës do të vazhdojë dhe prona publike do të lirohet nga uzurpimet e paligjshme", deklaroi ajo.

Ministrja bëri të ditur se u nis vetë drejt vendit të ngjarjes për të ndjekur nga afër ndërhyrjen. "Jam duke shkuar në Gjakovë, te Liqeni i Radoniqit, për të përcjellë nga afër aksionin e Inspektoratit Mjedisor për rrënimin e disa objekteve të ndërtuara pa leje në pronë publike", shkroi ajo.

Numri i saktë i objekteve që do të rrënohen nuk është bërë i ditur.