Rafal me kallashnikov në një lokal të Podujevës: i akuzuari pranon fajin, pastaj tërhiqet

Në sallën e Gjykatës së Prishtinës, deklarimi i të akuzuarit ndryshoi brenda pak minutash. Fatbardh Hamza, i akuzuar për tentim-vrasje me kallashnikov në një lokal të Podujevës, fillimisht e pranoi fajin pa rezerva — dhe pak më vonë, pas një konsultimi me mbrojtësin, u deklarua i pafajshëm.

Gjykimi nisi më 19 gusht 2026, me leximin e aktakuzës nga prokurorja Javorka Perlinçeviq. Hamza akuzohet për vrasje të rëndë në tentativë, për mbajtje në pronësi, kontroll ose posedim të paautorizuar të armës, si dhe për asgjësim apo dëmtim të pasurisë.

Me t'u lexuar aktakuza, i akuzuari nuk la vend për dilema. "Plotësisht fajtor. E ndjej veten fajtor për veprat penale për të cilat akuzohem. Më vjen keq për atë çka ka ndodhë. I premtoj gjykatës se kurrë hiç nuk do të kryej vepra të tilla në të ardhmen, e as vepra të tjera penale", tha Hamza.

Prokuroria u pajtua me pranimin e fajësisë, duke e cilësuar në përputhje të plotë me ligjin dhe me provat e mbledhura gjatë hetimeve. Sipas prokurores, për shkak të gjendjes psikike të të akuzuarit pas rastit ishte kërkuar një ekzaminim psikiatrik, i cili kishte vërtetuar se gjatë kryerjes së veprës Hamza kishte qenë plotësisht i vetëdijshëm për veprimet e tij.

Këtu procedura mori kthesë. Avokati mbrojtës Fevzi Podvorica tha se e pranon pranimin e fajësisë nga i mbrojturi, por vetëm për veprën penale të shkaktimit të rrezikut të përgjithshëm — jo për të tjerat. Ai kërkoi nga gjykata të konsultohej me klientin e tij.

Pas konsultimit, i akuzuari që pak më parë e kishte pranuar plotësisht fajin, u deklarua i pafajshëm për të gjitha veprat në aktakuzë. "Fajtor veç për rrezik të përgjithshëm, jo për me vra dikon, nuk kam dashtë", tha Hamza kur gjyqtari Agim Kuçi e pyeti nëse ndihet fajtor për veprat që i ngarkohen.

Pas këtij mohimi, gjyqtari Kuçi mori aktvendim për t'i ofruar mundësinë të akuzuarit dhe mbrojtësit të kundërshtonin provat dhe të parashtronin kërkesë për hedhjen e aktakuzës. Njëra nga palët e dëmtuara e pranishme në seancë, e identifikuar me inicialet F.B., u deklarua se nuk dëshiron të paraqesë kërkesë pasurore për dëmin e shkaktuar.

Sipas aktakuzës së Prokurorisë, të datës 3 korrik 2026, rasti ndodhi më 28 janar 2026 në Podujevë. I akuzuari ishte ulur në një tavolinë të lokalit bashkë me tashmë të dëmtuarin V.B. dhe me K.F. Pas një mosmarrëveshjeje me V.B., pretendon prokuroria, Hamza nxori nga çanta armën automatike "AK-47" dhe shtiu gjashtë herë në drejtim të të dëmtuarve, ndërsa këta po largoheshin nga lokali dhe pasi kishin dalë në rrugë.

Prokuroria pretendon se për armën e përdorur i akuzuari nuk kishte leje. Sipas aktakuzës, me rastin e ngjarjes u dëmtuan edhe tri vetura të parkuara në afërsi të lokalit.