Prizren: Arrest shtëpiak për dy infermierë të dyshuar se përvetësuan para të pacientëve

Dy infermierë të Qendrës Kryesore të Mjekësisë Familjare (QKMF) në Prizren po ndiqen nën masën e arrestit shtëpiak, të dyshuar se përvetësuan para të mbledhura nga bashkëpagesat e pacientëve për shërbime shëndetësore.

Gjykata Themelore në Prizren ka caktuar arrestin shtëpiak për një muaj ndaj dy të dyshuarve, të identifikuar me inicialet X.B. dhe B.R. Sipas vendimit të gjykatës, ata dyshohen se gjatë ndërrimeve të natës në QKMF-në e Prizrenit morën për vete një pjesë të parave të arkëtuara nga pagesat e pacientëve.

Periudhat e dyshuara përfshijnë gusht–nëntor 2024 dhe shkurt–dhjetor 2025. Sipas hetimeve të deritanishme, njëri prej të dyshuarve dyshohet se ka përvetësuar 1.250 euro, ndërsa tjetri 1.032 euro, çka e çon shumën totale të dyshuar në 2.282 euro.

Të dy të dyshuarit ishin arrestuar më 3 gusht dhe fillimisht u ishte caktuar masa e ndalimit prej 48 orësh. Me vendimin e fundit të gjykatës, ndaj tyre është caktuar arresti shtëpiak deri më 3 shtator 2026. Gjatë kësaj kohe atyre u ndalohet të largohen nga vendbanimi pa lejen e gjykatës dhe u është ndaluar kontakti me persona të caktuar.

Zbatimi i masës do të mbikëqyret nga Policia e Kosovës. Në rast se shkelin kushtet e arrestit shtëpiak, ndaj tyre mund të caktohet masa e paraburgimit.

Të dyshuarit prezumohen të pafajshëm derisa fajësia të mos vërtetohet me vendim të formës së prerë të gjykatës.