U fut mes një burri dhe një gruaje për t'i ndarë, kosovari plagoset me mjet të mprehtë në Mynih

Një 29-vjeçar nga Kosova u përpoq të ndalte një konflikt mes një burri dhe një gruaje në qendër të Mynihut. Ndërhyrja i kushtoi një plagosje të rëndë. Për këtë sulm, autoritetet gjermane kanë arrestuar një 31-vjeçar me shtetësi shqiptare.

Ngjarja ndodhi më 2 shtator. Gjatë përpjekjes për të ndarë palët, 29-vjeçari dyshohet se u godit me një mjet të mprehtë dhe mori lëndime të rënda në pjesën e sipërme të trupit. Ai u dërgua me urgjencë në spital, ku iu nënshtrua një ndërhyrjeje kirurgjikale.

Identifikimi i të dyshuarit kërkoi disa javë hetime. 31-vjeçari u arrestua më 29 tetor pranë banesës së tij në Mynih dhe është dërguar në paraburgim. Sipas mediave gjermane, ai dhe viktima nuk njiheshin më parë.

Hetimet për rastin vazhdojnë, ndërsa motivi i sulmit nuk është bërë ende publik. I dyshuari konsiderohet i pafajshëm deri në një vendim përfundimtar të gjykatës.