Doli të vendoste trekëndëshin e emergjencës: 20-vjeçari shqiptar goditet për vdekje në A1

Kishte zbritur nga makina për t'i paralajmëruar të tjerët për rrezikun. Pikërisht në ato çaste, Thomas Qirjaj, 20-vjeçar me origjinë shqiptare, u godit nga një fuoristradë në autostradën A1 në Itali dhe nuk mbijetoi. Tragjedia ndodhi në orët e para të së premtes, më 30 tetor, pranë zonës së Melegnano-s, në drejtim të San Giuliano Milanese.

Sipas mediave italiane, i riu udhëtonte me katër miq në një Volvo me targa zvicerane. Pak pasi kaluan barrierën e autostradës, automjeti doli jashtë kontrollit dhe u përplas me ndarësen që ndan korsitë e lëvizjes. Thomasi doli jashtë për të vendosur trekëndëshin e emergjencës dhe për t'i sinjalizuar drejtuesit e tjerë se rruga përpara ishte e rrezikshme.

Në atë moment ai u godit nga një SUV i drejtuar nga një 25-vjeçar nga Modena. Rindërtimi paraprak i ngjarjes tregon se drejtuesi i fuoristradës nuk arriti ta dallonte të riun në rrugë deri në momentin e fundit. Goditja ishte e rëndë: 20-vjeçari u dërgua me urgjencë në spitalin Predabissi në Vizzolo, por ndërroi jetë nga plagët, pavarësisht përpjekjeve të mjekëve. Katër miqtë e tij nuk pësuan dëmtime të rënda.

Rasti tani është në duart e Policisë Rrugore italiane dhe të Prokurorisë së Lodit, të cilat kanë nisur hetimet për dinamikën e aksidentit. Autoritetet po shqyrtojnë dy momente: çfarë e shkaktoi përplasjen fillestare të Volvo-s me ndarësen dhe në çfarë rrethanash fuoristrada goditi të riun. Sipas mediave italiane, drejtuesi i SUV-it do t'i nënshtrohet analizave toksikologjike si pjesë e procedurave hetimore. Shkaqet e aksidentit ende nuk janë zbardhur.

Thomasi kishte lindur në Piacenza dhe jetonte me prindërit në Caorso, në provincën e Piacenzës. Ishte fëmijë i vetëm dhe në dhjetor do të mbushte 21 vjeç. Kryetarja e bashkisë së Caorso-s, Roberta Battaglia, i shprehu ngushëllime familjes dhe e kujtoi atë si një të ri që e kishte parë të rritej dhe që ishte integruar mirë në komunitet.

I riu kishte luajtur edhe në futbollin amator. Klubi i tij vendosi të anulonte ndeshjen e planifikuar, në shenjë zie.