"Gra, revoltohuni!": Prishtina sërish në rrugë për Arlinda Zekajn, marshim drejt qeverisë

"Gra, revoltohuni!" Me këtë thirrje, protestuesit dolën sonte sërish në rrugët e Prishtinës, në një tjetër natë zemërimi për vrasjen e Arlinda Zekajt.

Tubimi nisi nga sheshi "Zahir Pajaziti", në qendër të kryeqytetit, dhe prej andej protestuesit marshuan drejt qeverisë. Mes tyre ishin aktivistë të shumtë për të drejtat e grave dhe barazinë gjinore, të cilët u solidarizuan me familjarët e viktimës dhe kërkuan që shteti të japë llogari për tragjedinë.

Kërkesa politike mbetet e njëjtë me atë të netëve të kaluara: dorëheqja e ministrave Xhelal Sveçla dhe Donika Gërvalla. Protesta e sotme është vazhdimi i një vale që po mbahet në kryeqytet për disa netë radhazi, kundër vrasjes së grave.

Arlinda Zekaj u vra të dielën, më 25 tetor, në Vitomiricë të Pejës. Sipas raportimeve, ajo u vra nga kunati i saj, ndërsa statusi i hetimit për rastin nuk është bërë ende i ditur publikisht.

Raportohet gjithashtu se Zekaj, jo pak herë, u ishte drejtuar policisë, prokurorisë dhe gjykatës për t'u mbrojtur nga bashkëshorti, të cilin e përshkruajnë si dhunues. Pikërisht këto thirrje për ndihmë janë në qendër të zemërimit që i mban protestuesit në rrugë, natë pas nate, me kërkesën që dikush të mbajë përgjegjësi.