Kurti thyen heshtjen për protestat në Shqipëri: “Shqipërinë e duam gjithmonë”

Kryeministri i Kosovës, Albin Kurti, ka dalë për herë të parë me një qëndrim publik për situatën politike në Shqipëri, ku protestat qytetare që nisën në fund të majit kanë marrë së fundmi kthesë të ashpër, me përplasje të dhunshme mes protestuesve dhe forcave të rendit.

Kurti zgjodhi një ton të matur, por të ngarkuar emocionalisht. "Shqipërinë e duam gjithmonë. Ajo është pjesë e pandashme e jona. Zhvillimet po i përcjellim me shqetësim, me kujdes, me përgjegjësi", deklaroi ai.

Më pas ai shkoi përtej shqetësimit. Sipas Kurtit, është jetike që shqiptarët t'i dëshmojnë vetes se janë të aftë të ndërtojnë drejtësi, një demokraci që i qëndron trysnisë së kapitalizmit dhe një qeverisje që nuk i nënshtrohet oligarkisë.

Kryeministri kosovar iu kundërpërgjigj edhe zërave që kanë tentuar ta lidhin Lëvizjen Vetëvendosje me ngjarjet në rrugët e Shqipërisë. "Unë kam parë me habi zëra të ndryshëm që janë përpjekur t’ia faturojnë edhe Vetëvendosjes këto protesta që zhvillohen në Republikën e Shqipërisë", tha Kurti.

Deklarata vjen në një moment të tensionuar për Shqipërinë, ku protestat, pas disa muajsh të zhvillimit paqësor, janë përshkallëzuar së fundmi. Në Kosovë, zhvillimet ndiqen me vëmendje, përfshirë edhe raportet politike mes Kurtit dhe kryeministrit shqiptar, Edi Ramës.