ReklamëHapësirë reklame
ReklamëHapësirë reklame
Reklamë
Ajo kishte trokitur në derën e policisë, prokurorisë, gjykatës dhe Qendrës për Punë Sociale. Thirrjen e fundit e bëri vetëm pak orë para se të vritej me sëpatë, siç dyshohet, nga kunati i saj.
Ilustrim i krijuar me inteligjencë artificiale. Nuk është fotografi e ngjarjes. Si e përdorim AI-në
Pak orë para se të vritej me sëpatë, A.Z. kishte kërkuar edhe një herë ndihmë nga institucionet. Ishte thirrja e fundit e një vargu kërkesash që, të paktën që nga mesi i vitit 2026, kishin kaluar nëpër zyrat e Policisë së Pejës, Prokurorisë Themelore në Pejë, gjykatës dhe Qendrës për Punë Sociale. I dyshuari për vrasjen është vëllai i bashkëshortit të saj, ndërsa vetë bashkëshorti, J.S., ndodhej në paraburgim për kanosjen ndaj saj kur ndodhi krimi. Data e saktë e vrasjes nuk dihet ende publikisht.
Dokumentet policore, gjyqësore dhe të prokurorisë, të siguruara nga Radio Evropa e Lirë, rindërtojnë rrugën që i parapriu vrasjes: raportime për dhunë dhe kërcënime, një betejë për kujdestarinë e djalit dhe një konflikt për pasurinë e përbashkët.
Një martesë mes dy shteteve
Sipas deklaratës së saj në polici, A.Z. dhe J.S. ishin të martuar për rreth 13 vjet. Rreth 11 prej tyre i kaluan në Shtetet e Bashkuara të Amerikës, ku në vitin 2014 u lindi djali. J.S. ka deklaruar se është edhe shtetas amerikan. Më 10 korrik 2026, ajo u tha policëve se gjatë jetës në Amerikë kishte përjetuar dhunë psikologjike dhe fizike nga bashkëshorti dhe se, sipas saj, e kishte raportuar atë edhe te autoritetet amerikane.
Në vitin 2024, nëna dhe djali u kthyen në Kosovë, ndërsa J.S. vazhdoi të punonte në Amerikë dhe të udhëtonte mes dy vendeve. Çifti kishte ndërtuar një shtëpi në Vitomiricë të Pejës. Para prokurorisë, A.Z. tregoi se kishte marrë edhe një kredi prej rreth 9.000 eurosh për nevojat e bashkëshortit. Ata nuk u divorcuan asnjëherë, megjithëse J.S. ka deklaruar se ishin ndarë "pa letra", pra jo zyrtarisht, që nga viti 2025.
Kërcënimi në telefon
Kërcënimet që ajo i raportoi në korrik 2026 datonin nga dhjetori i vitit të kaluar. Sipas Prokurorisë Themelore në Pejë, gjatë një bisede telefonike në dhjetor 2025, J.S. e kishte kërcënuar bashkëshorten me vrasje dhe i kishte kërkuar të largohej nga shtëpia. "Kam me të mbytë, kam me të ngre zhag, as ushtria s’ka me mujtë me të hek nga dora ime", janë disa nga fjalët që, sipas aktakuzës, ai ia kishte drejtuar asaj.
A.Z. deklaroi gjithashtu se ai ia kishte nxjerrë rrobat nga shtëpia, i kishte djegur dhe më pas ia kishte dërguar videon. Ajo shpjegoi se nuk i kishte raportuar menjëherë kërcënimet, sepse kishte shpresuar se bashkëshorti do të ndryshonte për hir të djalit. Në deklaratat e saj, ajo theksoi se ndihej shumë e rrezikuar prej tij.
Djali dhe beteja për kujdestarinë
Më 20 qershor 2026, djali shkoi të qëndronte te të afërmit e babait, fillimisht me pëlqimin e nënës. Sipas saj, më pas ai e ndërpreu kontaktin, dhe ajo pretendoi se babai e kishte ndikuar që të mos kthehej. Më 10 korrik ajo i raportoi kanosjet dhe dhunën e pretenduar në Policinë e Pejës. Policia intervistoi edhe djalin, i cili tha se dëshironte të qëndronte te të afërmit e babait dhe se nëna i kishte bërtitur, por nuk e kishte goditur. Më 13 korrik, A.Z. dha një deklaratë shtesë për marrëdhënien me të birin.
Më 14 korrik, J.S. u paraqit në polici, por zgjodhi të mos përgjigjej, duke thënë se do të fliste vetëm në prokurori. Më 17 korrik policia ngriti kallëzim penal për kanosjen, të cilin prokuroria e pranoi më 20 korrik.
Në prokurori, më 23 korrik, ai pohoi se ishte ndarë nga bashkëshortja rreth një vit më parë, por që martesa nuk ishte zgjidhur ligjërisht: "Ne jemi ndarë […] mirëpo nuk jemi nda me letra". Sipas aktakuzës, ai pranoi se i kishte përdorur fjalët kërcënuese, por u përpoq t'i justifikonte me konfliktin për djalin.
Po atë ditë, edhe djali kërkoi urdhër mbrojtjeje ndaj nënës, duke shprehur dëshirën për të mos pasur kontakt me të. Raporti psikologjik vuri në dukje se ai nuk kishte përshkruar dhunë fizike nga nëna dhe se nuk e kuptonte plotësisht kuptimin e një urdhri mbrojtjeje.
Urdhri i miratuar pjesërisht
Sipas raportit të Qendrës për Punë Sociale, më 5 shtator 2026 J.S. u largua nga Kosova drejt Shteteve të Bashkuara, ndërsa djali mbeti në kujdesin e të afërmve të tij, fakt që më pas u mor parasysh në procedurën për kujdestarinë. Dy ditë më vonë, më 7 shtator, A.Z. kërkoi urdhër mbrojtjeje emergjente ndaj bashkëshortit për dhunë në familje. Gjykata e miratoi atë vetëm pjesërisht.
Pas dy ditësh, përmes përfaqësuesve ligjorë, ajo e kundërshtoi vendimin dhe kërkoi masa të tjera mbrojtëse, përfshirë kujdestarinë e djalit. Nga 22 shtatori deri më 5 tetor 2026, Qendra për Punë Sociale shqyrtoi rrethanat familjare dhe përgatiti një rekomandim.
Kjo ishte rruga institucionale e një gruaje që kishte thënë qartë se ndihej në rrezik. Ajo u ndal me një sëpatë, ndërkohë që njeriu të cilin ajo e kishte denoncuar ndodhej në paraburgim, dhe i dyshuari për vrasjen ishte vëllai i tij.
Një zyrtar policor që dikur hetonte krah për krah me Muharrem Qerimin dëshmoi se ish-kolegu e kërkonte vazhdimisht për takime. Pas arrestimit, ai dyshon se ato takime mund të kenë qenë mbulesë.
