GLPS alarmon: Byroja për konfiskimin e pasurisë rrezikon të bëhet mjet politik

Byroja që do të ketë në dorë verifikimin dhe konfiskimin e pasurisë së pajustifikueshme të zyrtarëve në Kosovë rrezikon të kthehet në mjet politik dhe të cenojë sigurinë juridike të qytetarëve. Ky është paralajmërimi i Grupit për Studime Juridike dhe Politike (GLPS), vetëm pak para se Kuvendi ta shqyrtojë projektligjin në lexim të dytë të enjten.

Në një konferencë për shtyp, përfaqësuesit e kësaj organizate joqeveritare thanë se teksti aktual nuk i ka adresuar as gjetjet e Gjykatës Kushtetuese, as komentet e shoqërisë civile. Prandaj GLPS u kërkoi deputetëve që të mos e procedojnë votimin pa i zgjidhur më parë disa çështje, të cilat, sipas saj, mbeten në kundërshtim me aktgjykimin e vitit 2023 të Kushtetueses. Në qendër janë dy probleme: sa larg në kohë mund të shkojë hetimi i pasurisë dhe sa e pavarur do të jetë Byroja në funksionimin e saj.

Organizata i ka renditur shqetësimet e saj në katër pika.

E para ka të bëjë me afatin. Sipas GLPS-së, Kushtetuesja ka konstatuar se verifikimi dhe konfiskimi i pasurisë së zyrtarëve nuk mund të shtrihet përtej 10 vjetëve, sepse pas kësaj periudhe bëhet i pamundur sigurimi i provave. Megjithatë, projektligji vazhdon të përmbajë dispozitën sipas së cilës kësaj procedure i nënshtrohet çdo pasuri dhe çdo person zyrtar, kurdo, duke filluar nga data 17 shkurt 2008.

Pika e dytë prek drejtpërdrejt pavarësinë e institucionit. GLPS vlerëson se, me tekstin e tanishëm, Byroja rrezikon të shërbejë më shumë si mjet politik sesa si mekanizëm për konfiskim civil. Arsyeja qëndron te mënyra e zgjedhjes së drejtuesve të saj. "Është shqetësues fakti se dispozitat aktuale përcaktojnë një shumicë të thjeshtë për emërimin e Drejtorit dhe tre anëtarëve të Byrosë, dhe se kandidatët për këto pozita duhet të plotësojnë një prag minimal prej vetëm 5 vjetësh përvojë pune", thuhet në reagimin e organizatës.

E treta lidhet me sigurinë juridike të atyre që mund të përfundojnë nën verifikim. Sipas GLPS-së, projektligji i lë Byrosë mundësinë që të tërhiqet në çdo fazë nga propozimi për konfiskim, pa përcaktuar "në mënyrë të qartë se a do të mund të iniciohet procedurë penale nëse me provat e mbledhura në procedurën e konfiskimit ka indicie që e njëjta është fituar përmes veprës penale".

Pika e katërt ka të bëjë me drejtësinë e vetë procesit. Organizata pohon se ligji nuk garanton barazinë e palëve në procedurën e konfiskimit civil. "Dispozitat aktuale nuk sigurojnë barazi të palëve në procedurën e konfiskimit civil, përkatësisht ato përcaktojnë që subjekti të merret në pyetje nga gjykata, zyrtari i Byrosë dhe pala e tretë në seancë lidhur me pasurinë që është objekt shqyrtimi. Pra, ndonëse fryma e zbatimit të procedurës së konfiskimit civil është tërësisht kontestimore, këto dispozita përcaktojnë elementet që e vënë në pikëpyetje zhvillimin e një procedure të paanshme", thekson GLPS.