Mbi 100 armë zjarri vidhen nga një depo në Gjakovë, autorët ende në arrati

Më shumë se 100 armë zjarri kanë përfunduar në duar të panjohura pas një vjedhjeje në një depo armësh në rrugën “Fehmi Agani” në Gjakovë, rast që Policia e Kosovës e ka regjistruar si vjedhje të rëndë.

Sipas raportit 24-orësh të Policisë, persona të panjohur kanë hyrë në depo dhe kanë marrë armët. Vjedhja u denoncua më 30 tetor, rreth orës 18:00, nga dy ankues, shtetas të Kosovës.

Pas denoncimit, njësitë përkatëse policore dolën në vendngjarje dhe ndërmorën veprimet e nevojshme, ndërsa për rastin u njoftua edhe prokurori.

Autorët ende nuk janë identifikuar. Policia bën të ditur se hetimet po vazhdojnë për gjetjen e personave të dyshuar dhe për zbardhjen e rrethanave në të cilat ndodhi vjedhja.