Kurti ngre grup shtetëror për Apelin e Hagës, Konjufca në krye

Kryeministri i Kosovës dhe kreu i Lëvizjes Vetëvendosje, Albin Kurti, ka njoftuar themelimin e një grupi punues për strategjinë shtetërore në procedurat e Apelit. Kjo vjen pas aktgjykimit të Gjykatës Speciale ndaj katër ish-krerëve të Ushtrisë Çlirimtare të Kosovës (UÇK): Hashim Thaçit, Kadri Veselit, Jakup Krasniqit dhe Rexhep Selimit.

Njoftimin ai e dha në mbledhjen e Këshillit të Përgjithshëm të partisë. Sipas Kurtit, në grup bëjnë pjesë përfaqësues të institucioneve dhe të partive politike, ndërsa drejtimi i është besuar Glauk Konjufcës.

"Në rrethanat e padrejtësisë që prodhoi shumë mllef, kishim përgjegjësi që të menaxhonim me qytetarët e pakënaqur. Ky aktgjykim duhet patjetër të ndryshohet e korrigjohet në Apel sa më parë. Kemi themeluar grupin punues për strategjinë shtetërore për procedurat e Apelit, ku bëjnë pjesë përfaqësues të institucioneve dhe partive politike, nën drejtimin e Glauk Konjufcës", deklaroi Kurti.

Kryeministri nuk e zbuti vlerësimin për vendimin e Hagës. E kritikoi atë në katër rrafshe: juridik, moral, historik dhe faktik. "Aktgjykim i padrejtë juridikisht dhe moralisht, si dhe i pasaktë historikisht dhe faktikisht. Ky aktgjykim duhet ndryshuar dhe korrigjuar në shkallën e Apelit dhe atë sa më parë", tha ai.

Kurti e lidhi aktgjykimin edhe me zhvillimet politike në vend. Duke folur për procesin zgjedhor, ai e paraqiti mosshkuarjen në zgjedhje si një zgjedhje që, sipas tij, mori peshë të veçantë pas vendimit të Hagës: "Shkuarja në zgjedhje u dëshmua të jetë e kotë, por mosshkuarja në to kësaj radhe ishte edhe më e rëndësishme për kontekstin që u prodhua pas aktgjykimit për katër krerët e UÇK-së, Hashim Thaçin, Jakup Krasniqin, Kadri Veselin dhe Rexhep Selimin".

Gjykimi i ish-krerëve të UÇK-së në Dhomat e Specializuara të Kosovës në Hagë mbetet ndër temat më të ndjeshme të debatit politik dhe publik në Kosovë. Me ngritjen e grupit të drejtuar nga Konjufca, qeveria e Kurtit e zhvendos tani vëmendjen te shkalla e dytë e gjykimit, ku kërkon që vendimi të rishqyrtohet.