"Deri në 1 milion euro borxh fajdeje": dëshmitarët tregojnë gjendjen e rëndë të viktimës në gjyqin e Prishtinës

Një i dëmtuar që nuk kishte mundur të hante as dy lugë supë pas tri-katër ditësh pa ushqim, dhe pretendimi për një borxh që arrinte deri në një milion euro nën obligime fajdeje — këto ishin detajet që dolën në seancën e së hënës në Gjykatën Themelore në Prishtinë, ku dëgjoheshin dëshmitarët në gjykimin për fajde.

Në bankën e të akuzuarve janë Fehmi Demaku dhe Elmi Demaku. Sipas aktakuzës, Fehmi Demaku ngarkohet për veprat penale "Fajde", "Kanosje" dhe "Armëmbajtje pa leje", ndërsa Elmi Demaku për "Fajde" dhe "Armëmbajtje pa leje". Në seancë u dëgjuan tre dëshmitarë: Xhevdet Uka, Bashkim Lokaj dhe Ahmet Grajqevci.

Dëshmitari Xhevdet Uka tha se e njihte të dëmtuarin M.G. fillimisht si klient në servisin e tij, marrëdhënie që me kohë ishte shndërruar në respekt të ndërsjellë. Sipas tij, M.G. asnjëherë nuk i kishte folur për tema personale, por një ditë i kishte kërkuar disa para — për çfarë arsye, tha Uka, nuk e dinte, ndërsa shuma nuk i kujtohej. Në atë kohë, sipas dëshmitarit, i dëmtuari dukej i shqetësuar dhe i pakoncentruar.

Uka rrëfeu se bashkë me Bashkim Lokajn kishin shkuar në fshatin Kleçkë për ta takuar M.G., të cilin e gjetën, sipas fjalëve të tij, "në gjendje totalisht të rënduar". Rrugës, tregoi ai, Lokaj i kishte thënë se M.G. kishte borxhe ndaj disa personave, pa e përmendur shumën. Meqë i dëmtuari thoshte se ndihej nën presion, të dy dëshmitarët e kishin udhëzuar t'i drejtohej Policisë.

Më pas, vazhdoi Uka, kishin shkuar në një restorant, ku M.G. u përpoq të hante pasi kishte tri-katër ditë pa ngrënë — por nuk mundi të merrte as dy lugë supë. "As s'ka pas temperaturë, as grip, po ka qenë i shqetësum në atë masë sa që edhe mu më ka trishtu", tha dëshmitari. Në restorant kishin ardhur dy policë, të cilët e kishin marrë M.G. me vete dhe e kishin udhëzuar Ukën dhe Lokajn të njoftonin familjen, gjë të cilën e bënë.

Dëshmitari Bashkim Lokaj tha se e njihte M.G. që nga viti 2022, në lidhje me shitblerjen e një toke prej 48 ari, ku i dëmtuari kishte vepruar si ndërmjetësues. Sipas Lokajt, M.G. kishte insistuar që medoemos të gjendej një blerës për tokën — një këmbëngulje që, siç tha ai nga përvoja e vet në patundshmëri, nuk e konsideronte të zakonshme.

Në restorant, sipas Lokajt, M.G. i kishte folur për borxhet, duke thënë se nuk i duhej më as jeta, sepse ishte zhytur në borxh deri në një milion euro nën obligime fajdeje. "Unë kom përjetu gjithëfarë situate në jetë, por person të gjallë nuk kom pa më keq", dëshmoi Lokaj. Edhe ai tha se kishte njoftuar Policinë, e cila më pas e kishte marrë të dëmtuarin.

I treti që dha dëshmi ishte Ahmet Grajqevci, baba i të dëmtuarit M.G. dhe baxhanak i të akuzuarit Elmi Demaku. Grajqevci tha se djali i tij vuante nga shqetësime të thella që nga pandemia, gjatë viteve 2022-2023. Sipas tij, M.G. zotëronte pasuri të shumta — toka e shtëpi në Fushë Kosovë, banesa dhe toka të tjera — por i kishte shitur pothuajse të gjitha lokalet dhe banesat. Grajqevci tregoi se i biri i kishte thënë dy-tri herë se kishte shitur banesa, por se ai nuk e kishte pyetur se ç'do të bënte me ato para.