Zjarri po digjet prej dy ditësh te Volljaku, fshati kërkon ndërhyrje urgjente

Dy ditë me radhë zjarri nuk është ndalur në afërsi të Volljakut, në komunën e Klinës. Vatra ka përfshirë zonën nga Qestati deri te Fusha e Mullinit, duke rrezikuar natyrën, pronat dhe banorët e zonës.

Banorët e fshatit kanë dalë publikisht me një apel drejtuar organeve kompetente, duke kërkuar ndërhyrje urgjente nga zjarrfikësit, Komuna e Klinës dhe institucionet e tjera përgjegjëse. Ata kërkojnë që ekipet profesionale të dalin në terren sa më shpejt dhe me kapacitetet e nevojshme, për ta lokalizuar dhe shuar zjarrin para se situata të përkeqësohet.

Në të njëjtën kohë, banorët u kanë bërë thirrje qytetarëve që ndodhen në zonë të tregojnë kujdes dhe të mos rrezikojnë jetën duke u përpjekur ta luftojnë zjarrin pa pajisje dhe pa koordinim me ekipet profesionale.