Vushtrria nën tym: mbi 16 ndërhyrje në një ditë, komandanti flet për zjarrvënie të qëllimshme

Mbi 16 ndërhyrje brenda një dite të vetme. Kaq numëron Brigada e Zjarrfikësve në Vushtrri, ndërsa komuna vazhdon të përballet prej disa ditësh me zjarre në terren të hapur.

Vatra kryesore këtë të fundit është ajo mes Gorolakut dhe fshatit Skoçan, ku janë angazhuar tri ekipe zjarrfikësish. "Vatra aktive ka të bëjë me pjesën e Gorolakut, që lidhet me fshatin Skoçan. Tri ekipe aktualisht po marrin pjesë në lokalizimin e këtij zjarri. Përndryshe, sot kemi ndërhy në mbi 16 raste gjatë ditës. Kryesisht janë stërnishte, barishte, shkurre dhe male", ka deklaruar komandanti i Brigadës së Zjarrfikësve në Vushtrri, Fadil Hyseni.

Sipas tij, shkaku i këtyre zjarreve nuk lidhet as me temperaturat e as me ndonjë defekt. "Natyra e zjarrit është zjarrvënie e qëllimshme 100%. Nuk ka të bëjë me faktorë temperaturash, ose ndonjë gabimi teknik. Ndodhë me pasë edhe telashe a ndonjë incident. Por, këto raste nuk kanë të bëjnë me ato gjëra, kanë të bëjnë me zjarrvënie të qëllimshme", tha Hyseni.

Për vatrën aktuale, komandanti siguron se situata po mbahet nën mbikëqyrje dhe se banorët nuk janë të rrezikuar. "Zjarrin e kemi nën kontroll. Diçka rrezik nuk ka. Fatmirësisht, nuk paraqet rrezik për objekte, as për shtëpia as për njerëz. Jemi duke bërë përpjekje që me e shti të tërin nën kontroll. Kjo është dita e dytë që po ballafaqohemi me këtë situatë", tha ai.

Deri më tani nuk është bërë e ditur ndonjë veprim i autoriteteve ndaj personave që dyshohen se i kanë ndezur zjarret.