Seanca konstituive shtyhet për 9 shtator, opozita: Kosova ka dalë jashtë binarëve kushtetues

Kuvendi i Kosovës mbetet i pakonstituuar dhe data e re e njoftuar nga kryesuesi i seancës konstituive, Avni Dehari, është 9 shtatori. Njoftimin e bëri dje deputeti i Vetëvendosjes, i cili tha se vendimin e mori duke u bazuar në marrëveshjen e arritur mes kreut të Lidhjes Demokratike të Kosovës, Lumir Abdixhiku, dhe kreut të Vetëvendosjes, Albin Kurti, për emrin e Bekim Sejdiut për president.

Reagimi i partive ishte i menjëhershëm. Nëse deri më tani Dehari dhe Vetëvendosja u kritikuan për shkeljen e afatit kushtetues, tani kritika ka të bëjë me shkeljen e afatit që vetë Vetëvendosja e kishte caktuar sipas interpretimit të saj. Kundërshtimet erdhën kryesisht nga dy parti opozitare, Aleanca dhe Partia Demokratike e Kosovës.

Ardian Gjini nga Aleanca vlerësoi dje se vendi "ka dalë jashtë binarëve kushtetues" dhe theksoi se opozita as nuk është kontaktuar për pjesëmarrje në seancë. "Nuk na ka kontaktuar askush [për pjesëmarrje në seancë]. Nuk kemi marrë vendim. Shumë shpejt, të martën e kemi mbledhjen e rregullt të kryesisë, nëse është nevoja, mblidhemi edhe më herët, dhe do të marrim vendim se çka do të bëhet më tutje, por po më duket se mundeni me nxjerrë gjithçka prej asaj që e thashë. Kosova ka dalë jashtë binarëve kushtetues. Çkado që ndodh është jo e ligjshme sot. Të gjitha vendimet që janë tu i marrë, të gjitha nënshkrimet që i qesin nëpër letra, janë të paligjshme", deklaroi Gjini.

Kryetari i PDK-së, Bedri Hamza, e quajti sot situatën "një absurd të ri". "Dhe tash kemi ardhur deri te një absurd i ri. Për javë të tëra, Vetëvendosja është përpjekur ta arsyetojë sjelljen e saj përmes interpretimit të vet të afateve për konstituimin e Kuvendit. Sot po shihet se po shkelet edhe ai afat. Pra, tashmë nuk po shkelen vetëm afatet dhe obligimet që burojnë nga rendi kushtetues. Po shkelet edhe afati sipas interpretimit të vetë Vetëvendosjes. Tash, vazhdimi i seancës konstituive është thirrur për 9 shtator, pas afatit prej 30 ditëve që e ka përcaktuar vetë Vetëvendosja. Por, Kuvendi i Kosovës nuk mund të presë derisa një parti t'i përfundojë kalkulimet e veta", tha Hamza.

Në qendër të mosmarrëveshjes qëndron llogaritja e afatit. Sipas njohësve të Kushtetutës, afati për konstituimin e Kuvendit ka përfunduar më 7 gusht, datë që shënon 30-ditëshin nga certifikimi i rezultateve të zgjedhjeve të qershorit. Vetëvendosja e ka kundërshtuar këtë interpretim, duke thënë se afati fillon vetëm pas thirrjes së seancës konstituive, e cila ishte bërë më 6 gusht. Por edhe sipas asaj llogaritjeje, data e caktuar për vazhdimin e seancës, 9 shtatori, bie jashtë 30-ditëshit.

Ndryshe nga dy partitë opozitare, LDK-ja ka mbajtur qëndrim të heshtur dhe nuk ka reaguar lidhur me ftesën e Deharit. Ajo nuk ka marrë pjesë as në aktivitetet që PDK-ja dhe Aleanca i kanë zhvilluar disa herë para qeverisë dhe në Kuvend. Të martën që shkoi, Abdixhiku njoftoi se 6 deputetë të LDK-së kanë kundërshtuar marrëveshjen e tij me Kurtin dhe tha se ai, bashkë me 12 deputetë të LDK-së, do të jetë në sallë kur të votohet për presidentin.