Deri në 7 mijë euro për studime jashtë: MASH hap thirrjet për pesë skema bursash

Deri në 7 mijë euro për një student që ndjek studimet master jashtë vendit: kjo është shuma më e lartë që ofron paketa e re e bursave të Ministrisë së Arsimit dhe Shkencës (MASH). Ministria ka hapur thirrjet për pesë skema të bursave studentore, me mbështetje financiare që shkon nga 1 mijë deri në 7 mijë euro.

Tri nga skemat kanë vlerë fikse prej 1000 eurosh. E para është bursa elitare për studentët e universiteteve publike në nivelin baçelor dhe master, e cila përfshin edhe studentët me aftësi të kufizuar. E dyta u dedikohet vajzave në fushat STEM (shkencë, teknologji, inxhinieri dhe matematikë), ndërsa e treta studentëve nga komunitetet rom, ashkali dhe egjiptian.

Dy skemat e tjera synojnë ata që studiojnë jashtë vendit. Studentët e nivelit baçelor mund të përfitojnë deri në 5000 euro, kurse ata të nivelit master deri në 7000 euro.

Kandidatët ftohen të shqyrtojnë kriteret përkatëse dhe të aplikojnë përmes platformës e-Kosova, në linqet e publikuara nga ministria në faqen e saj zyrtare, mash.rks-gov.net, ndonëse afatet e sakta të aplikimit nuk janë bërë të ditura në njoftim.

"MASh mbetet e përkushtuar në motivimin e të rinjve dhe ofrimin e kushteve për studim e zhvillim akademik. Investimi në zhvillimin e kuadrove të reja është esencë e zhvillimit të përgjithshëm të shoqërisë", thuhet në njoftimin e ministrisë.