Protezat e para të gjurit arrijnë në QKUK, listat e pritjes shpërndahen edhe në rajone

Kontingjenti i parë i protezave të gjurit ka mbërritur në Klinikën e Ortopedisë të Qendrës Klinike Universitare të Kosovës (QKUK). Bashkë me të ka nisur edhe një ndryshim në mënyrën se si menaxhohen listat e gjata të pritjes për këto ndërhyrje.

Sipas QKUK-së, furnizimi shënon fillimin e realizimit të procesit dhe përbën "një hap të rëndësishëm drejt përmirësimit të qasjes së pacientëve në shërbimet ortopedike". Protezat synojnë t'u shërbejnë personave që kanë nevojë për vendosjen e tyre, ndonëse institucioni nuk ka bërë të ditur sa copë përmban kontingjenti i parë.

Ndryshimi më i madh ka të bëjë me rrugën që do të ndjekin pacientët. "Në bashkëpunim me Ministrinë e Shëndetësisë, ka nisur procesi i decentralizimit të listave të pritjes për vendosjen e protezave të gjurit dhe të kokërdhokullës, me synimin që rastet të shpërndahen në mënyrë proporcionale ndërmjet QKUK-së dhe spitaleve të përgjithshme rajonale, sipas kapaciteteve dhe mundësive për trajtim", njofton QKUK.

Qëllimi, sipas institucionit, është që barra të mos bjerë vetëm mbi qendrën klinike në Prishtinë. "Ky organizim synon të lehtësojë barrën e listave të pritjes, të përmirësojë efikasitetin e shërbimeve shëndetësore dhe t’u mundësojë pacientëve trajtim më afër vendbanimit të tyre, pa pasur nevojë që të gjitha rastet të drejtohen vetëm në QKUK."

QKUK e cilëson ndryshimin si pjesë të një reforme më të gjerë: "Ky proces përbën një hap të rëndësishëm drejt një sistemi shëndetësor më të qasshëm, më efikas dhe më të orientuar drejt nevojave të pacientëve."