Prishtina gjobitet dy herë për mbeturinat, Pacolli akuzon komunën për keqmenaxhim të “Pastrimit”

Komuna e Prishtinës është gjobitur dy herë nga Ministria e Mjedisit dhe Planifikimit Hapësinor (MMPH), me nga 5 mijë euro secila gjobë, dhe ministrja e këtij resori, Fitore Pacolli, e ka akuzuar hapur administratën e kryeqytetit se nuk po i përmbush detyrimet për menaxhimin e mbeturinave.

Akuza e saj shkon përtej gjobave dhe prek drejtpërdrejt ndërmarrjen publike që mbledh mbeturinat në kryeqytet. "Komuna e Prishtinës, përveçse po tregon mungesë vullneti për t’i kryer obligimet e saj, po e keqmenaxhon ndërmarrjen publike ‘Pastrimi’", deklaroi Pacolli në një konferencë për media. Vetë ndërmarrja rajonale e mbeturinave “Pastrimi” është gjobitur me 2 mijë euro.

Prishtina nuk është e vetmja në listë. Sipas ministres, Komuna e Istogut është gjobitur me 5 mijë euro, ndërsa kompania rajonale e mbeturinave “Ambienti” në Pejë ka marrë dy gjoba, njërën prej 5 mijë dhe tjetrën prej 2 mijë eurosh. Kompania “Higjiena” në Deçan, e gjobitur më herët me 2 mijë euro, figuron po ashtu mes subjekteve të ndëshkuara.

Pacolli tha se ministria ka zhvilluar dhjetëra aksione inspektimi dhe ka shtuar mbikëqyrjen për të parandaluar keqmenaxhimin e mbeturinave. Ajo e cilësoi gjendjen në disa komuna të Kosovës si shqetësuese dhe theksoi se institucionet qendrore nuk mund të rrinë pasive kur rrezikohen shëndeti publik dhe mjedisi. "Për të mbrojtur shëndetin publik, nuk mund të rrimë duarkryq kur krijohen situata emergjente, edhe pse kompetencat tona në menaxhimin e mbeturinave janë të kufizuara", tha ministrja.

Një pjesë e problemit, sipas saj, doli në pah gjatë programit për pastrimin e deponive ilegale. Për këtë program janë ndarë një milion euro për kompanitë rajonale dhe deri tani janë larguar mbi 8 mijë tonë mbeturina. Por procesi, tha Pacolli, ka zbuluar gjendjen e rëndë të këtyre kompanive, të cilat përballen me keqmenaxhim dhe mungesë kritike të mjeteve të punës. Për këtë arsye është planifikuar buxhet shtesë që ministria të ndërhyjë drejtpërdrejt aty ku komunat ose rajonet dështojnë.

Kontrollet në terren do të vazhdojnë, paralajmëroi ministrja, duke përfshirë edhe monitorimin me dronë dhe kamera. Ajo u bëri thirrje qytetarëve që mbeturinat t’i dërgojnë në deponitë e licencuara, të cilat në rajone janë të hapura çdo të shtunë, dhe paralajmëroi masa ndëshkuese për këdo që i hedh ato në vende të ndaluara.

Në qendër të shqetësimeve të saj mbetet deponia e Mirashit. Sipas Pacollit, ajo duhet mbyllur urgjentisht për shkak të mbingarkesës dhe rrezikut ekologjik, ndërsa pas mbylljes parashihet rehabilitimi i hapësirës dhe shndërrimi i saj në zonë të gjelbër e park mbrojtës. Caktimi i lokacionit për Qendrën e Menaxhimit të Mbeturinave në Lipjan u cilësua i domosdoshëm, edhe sepse prej tij varet financimi prej 50 milionë eurosh nga qeveria gjermane.