Kosova dhe Belgjika drejt hetimeve të përbashkëta: Qeveria miraton projektligjin për ratifikim

Autoritetet e Kosovës dhe të Belgjikës do të mund të ngrenë grupe të përbashkëta hetimore dhe të ndjekin pasurinë e fituar nga krimi përtej kufijve, sipas marrëveshjes së re për ndihmë të ndërsjellë juridike në çështje penale. Qeveria e Kosovës ka miratuar Projektligjin për ratifikimin e kësaj marrëveshjeje, njoftoi Zyra e Kryeministrit.

Sipas Qeverisë, marrëveshja synon "forcimin e bashkëpunimit ndërmjet autoriteteve të të dyja vendeve në sigurimin e provave, zhvillimin e procedurave penale dhe luftimin e kriminalitetit përtej kufijve shtetërorë".

Ministrja e Drejtësisë, Donika Gërvalla, e cilësoi dokumentin si një hap që i jep bazë më të fortë ligjore bashkëpunimit mes dy vendeve. "Kjo Marrëveshje forcon kuadrin ligjor të bashkëpunimit mes dy shteteve tona në çështjet penale, dhe rregullon procedurat për sekuestrimin dhe konfiskimin e pasurisë, si dhe krijimin e grupeve të përbashkëta hetimore, me qëllim të rritjes së efikasitetit në luftimin e krimit transnacional", tha Gërvalla.

Në praktikë, sipas Qeverisë, marrëveshja vendos rregulla të përbashkëta për shkëmbimin e provave, për kryerjen e veprimeve hetimore dhe procedurale, si dhe për trajtimin e kërkesave për ndihmë juridike. Ajo përcakton gjithashtu përgjegjësitë e autoriteteve të të dy shteteve dhe kushtet për zbatimin ligjor.

Marrëveshja ende duhet të ratifikohet para se të hyjë në fuqi, ndërsa data e ratifikimit nuk është bërë e ditur.