Dy gjoba për Prishtinën, 10 mijë euro: MMPH ndëshkon komunat dhe kompanitë e mbeturinave

Komuna e Prishtinës është gjobitur dy herë nga 5,000 euro, gjithsej 10 mijë euro, nga Ministria e Mjedisit, Planifikimit Hapësinor dhe Infrastrukturës (MMPH), për moskryerjen e obligimeve ligjore në menaxhimin e mbeturinave. Kryeqyteti nuk është i vetmi në listë: ndëshkime kanë marrë edhe Komuna e Istogut dhe tri kompani rajonale të mbeturinave në Prishtinë, Pejë dhe Deçan.

Masat i bëri publike ministrja e Mjedisit, Planifikimit Hapësinor dhe Infrastrukturës, Fitore Pacolli, në një konferencë për media pas mbledhjes së qeverisë. Sipas saj, gjobat janë shqiptuar ditët e fundit, për shkak të gjendjes së rëndë me mbeturina në disa pjesë të Kosovës, gjendje që, tha ajo, paraqet rrezik për mjedisin dhe shëndetin publik.

Shumat e shqiptuara, siç i renditi ministrja, janë këto: Komuna e Istogut 5,000 euro; kompania rajonale e Prishtinës “Pastrimi” 2,000 euro; kompania rajonale “Ambienti” në Pejë dy gjoba, një prej 5,000 euro dhe një prej 2,000 eurosh; kompania “Higjiena” në Deçan 2,000 euro.

Pacolli pranoi se një pjesë e komunave e bëjnë mirë punën e mbledhjes së mbeturinave, por kritikat më të ashpra ia drejtoi kryeqytetit dhe ndërmarrjes së tij publike. "Këtu fatkeqësisht prin komuna e Prishtinës, e cila si kryeqytet ka edhe numrin më të madh të banorëve, por komuna e Prishtinës përveçse i mungon vullneti për të kryer obligimet e saj, ata po keqmenaxhojnë edhe me ndërmarrjen publike “Pastrimi”", tha ajo.

Ministrja theksoi se kompetencat e qeverisë në këtë fushë janë të kufizuara, por se kjo nuk e justifikon mosveprimin. "Para kësaj gjendjeje, qeveria nuk mund të rrijë duarkryq kur krijohet një situatë emergjente edhe pas asaj që kompetencat tona janë të limituara sa i përket menaxhimit të mbeturinave", deklaroi Pacolli. Sipas saj, ministria ka ndërmarrë dhjetëra aksione inspektimi dhe ka vendosur mbikëqyrje strikte, "duke bërë të qartë se keqmenaxhimin nuk do ta tolerojmë në asnjë nivel".

Gjobat nuk kanë prekur vetëm institucionet. Pacolli tha se ministria ka gjobitur edhe një numër të madh qytetarësh që hedhin mbeturina në vende ku nuk lejohet, ndërsa kontrollet në terren bëhen shpesh, me dronë dhe kamera. Qytetarët u ftuan t'i dërgojnë mbeturinat në deponitë legale në rajonet e tyre, të cilat janë të hapura çdo të shtunë.

Pamja më e rëndë, sipas ministres, është në komunat veriore të Kosovës. "Situata në komunat e veriut është më e vështirë. Për veriun është caktuar lokacioni dhe falë bashkëpunimit me BE-në, do të ndërtohet deponia e re", tha Pacolli.