Prokuroria serbe rishqyrton pse Radoiçiqi mbeti i lirë pas sulmit në Banjskë

Një komision i Prokurorisë së Lartë Publike të Serbisë po shqyrton rastin e Milan Radoiçiqit, biznesmenit kontrovers të dyshuar për organizimin e sulmit të armatosur në Banjskë, në veri të Kosovës. Në qendër të shqyrtimit është një pyetje e thjeshtë: pse ai nuk u mbajt në paraburgim pas marrjes në pyetje në Prokurorinë e Lartë Publike në Beograd, pavarësisht peshës së veprave për të cilat dyshohet.

Mbikëqyrja e rastit bëhet me udhëzim të kryeprokurores së Serbisë, Zagorka Dolovac.

Vetëm një argument për paraburgim

Sipas portalit serb nova.rs, një nga arsyet pse Radoiçiqi doli i lirë ishte mënyra si u hartua kërkesa për paraburgim. Prokurori i atëhershëm i rastit, Nikola Panteliq, kishte përmendur vetëm një rrethanë që mund të pengonte procedurën nëse i dyshuari mbetej i lirë: rrezikun e arratisjes.

Pikërisht ky argument rezultoi i dobët. Radoiçiqi ishte dorëzuar vetë dhe ishte paraqitur vullnetarisht për t'u marrë në pyetje, gjë që e bënte rrezikun e arratisjes të pabazuar.

Komisioni pritet të sqarojë tani pse Panteliqi nuk u mbështet në tri rrethanat e tjera që ligji i parasheh si bazë për paraburgim: rrezikun e përsëritjes së veprës penale, ndikimin te dëshmitarët dhe shqetësimin e opinionit publik. Ndërkohë, Panteliqi është avancuar në detyrë dhe tani drejton Prokurorinë e Lartë Publike në Pançevë.

Gjyqtarja: lidhjet me Beogradin mjaftojnë

Pas marrjes në pyetje, prokuroria kishte kërkuar paraburgim deri në 30 ditë për Radoiçiqin. Në kërkesë theksohej se ai herë pas here qëndronte jashtë vendbanimit të tij për më shumë se 90 ditë, pa e raportuar këtë.

Gjyqtarja që trajtonte rastin e hodhi poshtë kërkesën. Sipas vlerësimit të saj, lidhjet personale, familjare dhe pasurore të Radoiçiqit me Beogradin, paraqitja vullnetare në polici dhe dorëzimi i pasaportës mjaftonin për të garantuar praninë e tij në procedurë.

Në vend të paraburgimit, gjykata vendosi masa kufizuese: ndalim largimi nga Serbia pa miratimin e gjykatës, marrje të përkohshme të pasaportës dhe detyrim për t'u paraqitur rregullisht në polici. Atij iu ndalua edhe udhëtimi drejt Kosovës, me paralajmërimin se mund të përfundonte në paraburgim nëse i shkelte ndalesat dhe detyrimet e caktuara.

Udhëzim i detyrueshëm për 87 prokurori

Rasti i Radoiçiqit është pjesë e një mbikëqyrjeje më të gjerë. Kryeprokurorja Dolovac ka nxjerrë një udhëzim të detyrueshëm për të gjitha 87 prokuroritë në Serbi, që anëtarëve të komisionit të posaçëm t'u lejohet qasja në çdo lëndë që kërkojnë të shqyrtojnë. Moszbatimi i këtij udhëzimi konsiderohet shkelje disiplinore.