Gjurmët në banesë çojnë te 48-vjeçari shqiptar: i dyshuar për vrasje në Athinë

Shenjat e gishtave dhe gjurmët biologjike të lëna në banesën e viktimës e kanë çuar policinë greke te një shtetas shqiptar 48-vjeçar, i cili tani ndodhet në paraburgim si i dyshuar për një vrasje të kryer më 24 korrik në lagjen Galaci të Athinës.

I dyshuari, me inicialet I.K., sipas autoriteteve greke, e njihte viktimën dhe shkonte herë pas here në banesën e tij për të kryer punë dhe shërbime të ndryshme, për të cilat paguhej me shuma të vogla parash. Identiteti i viktimës nuk është bërë publik.

Hetuesit dyshojnë se pas vrasjes qëndron një grabitje. Viktima raportohet se kishte gjendje të mirë ekonomike, ndërsa pas ngjarjes nga banesa e tij mungonin para dhe sende me vlerë.

I përballur me provat, 48-vjeçari u ka deklaruar policëve se nuk mban mend çfarë ndodhi, duke pretenduar se në atë moment ishte nën efektin e lëndëve narkotike.

Sipas Top Channel, I.K. është ndaluar mbi 20 herë nga policia greke që nga viti 2019. Ai dyshohet gjithashtu për përfshirje në dhjetëra vjedhje dhe vepra të tjera penale, të lidhura me sigurimin e parave për blerjen e narkotikëve.

Pas arrestimit, ai u paraqit para gjykatës, e cila vendosi ndaj tij masën e paraburgimit pa afat deri në shqyrtimin gjyqësor të çështjes. Deri në një vendim të gjykatës, 48-vjeçari mbetet i dyshuar.