"Vendi i parë i NATO-s ku do të protestojë ushtria": ushtarët dalin kundër Misajllovskit

Ushtria e Maqedonisë së Veriut rrezikon të shohë diçka të pazakontë: ushtarët e saj në protestë. Ushtarët profesionistë kanë paralajmëruar se do të dalin më 7 nëntor, në shenjë kundërshtimi ndaj zgjidhjes që Ministria e Mbrojtjes ka propozuar për statusin e tyre pasi mbushin 45 vjeç.

Thelbi i mosmarrëveshjes është kontrata. Ushtarët profesionistë punojnë me marrëveshje me kohë të caktuar dhe, sipas tyre, kur arrijnë moshën 45-vjeçare mbeten pa punë. Ata kërkojnë zgjidhje për statusin, mundësinë të punojnë deri në moshën e zakonshme të pensionimit, të drejta të barabarta për pensionet dhe rritje të pagave.

"Ushtarët profesionistë punojnë 25 vjet me marrëveshje me kohë të caktuar. Mendoj se jemi të vetmit në shtet që punojmë me marrëveshje me kohë të caktuar dhe në moshën 45-vjeçare, një ditë para ditëlindjes sonë, mbesim pa punë. Kjo nuk ndodh në asnjë vend tjetër të NATO-s. Do të jemi vendi i parë i NATO-s ku do të protestojë ushtria", deklaroi Aleksandar Naskovski, kryetar i Sindikatës së Pavarur të Ushtarëve Profesionalë.

Paralajmërimi vjen vetëm një ditë pasi ministri i Mbrojtjes, Vllado Misajllovski, njoftoi se kishte arritur marrëveshje me pjesëtarë të ushtrisë për të zgjidhur këtë problem shumëvjeçar. Sipas ministrit, pas moshës 45 vjeç statusi i ushtarëve profesionistë do të kalojë nga ushtarak në civil, ndërsa vetë ata do të vendosin nëse duan të qëndrojnë në ushtri apo jo.

Misajllovski i përshkroi tre rrugët që do t'u hapen ushtarëve: kompensim për ndërprerjen e kontratës, transferim në një institucion tjetër shtetëror ose vazhdim i shërbimit në Ushtri. "Kjo reformë ofron një mundësi të re, ajo parashikon që çdo ushtar profesionist që mbush 45 vjeç të marrë një mundësi tjetër që vjen sipas ligjit. Çdo ushtar, kur mbush 45 vjeç, ka mundësinë të zgjedhë nëse dëshiron të marrë një kompensim për ndërprerje të kontratës së punës, i cili përafërsisht varion nga 30 deri në 40.000 euro, mund të largohet në një institucion tjetër në shtet, por mund të qëndrojë edhe në Ushtri", tha ai.

Sindikata nuk e pranon këtë skemë. Ajo pretendon se ushtarët që e kanë mbështetur janë manipuluar dhe paralajmëron se kalimi në status civil do t'u sjellë paga më të ulëta.

"Zgjidhja që e ofron ministri Misajllovski nuk është zgjidhje ligjore. Ai nuk ofron ndryshim të ligjit por nga një dispozitë që tashmë është në ligj, ofron diçka që nuk ekziston. Ai u ofron ushtarëve të kalojnë në persona civilë, në sigurim. Diçka e tillë nuk ekziston në ushtri. I manipulon ushtarët që do t’i mbajnë rrogat e tyre. Ajo nuk është e vërtetë sepse ligji për sigurimet thotë se rroga e sigurimeve u llogaritet sipas dispozitave të tjera, të ndryshme nga personat ushtarakë. Kështu që këta persona do të kenë ulje të rrogës dhe kushte më të këqija", theksoi Naskovski.