Ambasada amerikane paralajmëron: protestat në Tiranë rrezikojnë të kthehen në dhunë

Ambasada e Shteteve të Bashkuara në Tiranë ka ngritur alarmin për protestat që po vazhdojnë në Shqipëri, duke paralajmëruar se tubimet e pritshme të shtunën mund të përshkallëzohen në dhunë. Në një deklaratë zyrtare, misioni diplomatik amerikan thekson se disa nga demonstratat e deritanishme kanë dalë tashmë jashtë kontrollit.

"Demonstratat vazhdojnë në qendër të Tiranës dhe rreth ndërtesave qeveritare. Disa demonstrata janë përshkallëzuar në trazira të dhunshme, me mjete ndezëse, gurë të hedhur dhe dëmtim prone. Demonstrata të tjera mund të ndodhin në ditët në vijim, përfshirë qytete jashtë Tiranës", thuhet në deklaratë.

Sipas Ambasadës, protestat mund të përhapen edhe në rrugët përreth, gjë që sjell më shumë prani policore, bllokime trafiku, devijime dhe mbyllje rrugësh. Paralajmërimi është i drejtpërdrejtë për këdo që ndodhet në afërsi: "Kushdo që ndodhet brenda ose pranë një zone demonstrate mund të ekspozohet ndaj gazit lotsjellës, fishekzjarrëve të lëshuar horizontalisht, mjeteve ndezëse dhe plumbave prej gome ose predhave."

Për këtë arsye, Ambasada i ka këshilluar punonjësit e saj të shmangin të gjitha zonat ku zhvillohen demonstrata. Qytetarëve u kërkohet të tregojnë kujdes, të qëndrojnë larg vendeve të protestave dhe të ndjekin udhëzimet e autoriteteve vendore. "Ju lutemi qëndroni vigjilentë dhe jepini përparësi sigurisë suaj personale. Ndiqni mediat vendase dhe udhëzimet e autoriteteve vendore të zbatimit të ligjit për përditësimet më të fundit", shton deklarata.

Pasojat pritet të ndihen edhe në jetën e përditshme të kryeqytetit. Sipas Ambasadës, në Tiranë priten mbyllje të mëtejshme ose shërbime të reduktuara, përfshirë transportin publik dhe zyrat qeveritare.