Shqipëri: policia merr fuqinë të ndalojë daljen nga vendi të protestuesve pa vendim gjykate

Policia e Shtetit në Shqipëri tani mund të kufizojë daljen jashtë vendit të personave të dyshuar për përfshirje në akte dhune gjatë protestave, edhe pa një vendim gjykate. Kompetenca e re vjen nga një vendim i qeverisë shqiptare, i publikuar të enjten në Fletoren Zyrtare.

Vendimi, i cilësuar nga kritikët si një "listë e zezë" e protestuesve, ka ngritur shqetësime për cenimin e të drejtave kushtetuese dhe për anashkalimin e gjyqësorit. Thelbi i debatit është pikërisht se një masë që prek lirinë e lëvizjes së qytetarëve vendoset nga policia, pa kontrollin e një gjyqtari.

Ekspertët janë të prerë në vlerësimin e tyre: sipas tyre, vendimi "shkel Kushtetutën dhe synon të frenojë protestat".

Masa vjen në një kohë kur qeveria ka shtrënguar tashmë rregullat ndaj protestuesve. Nuk dihet ende nëse vendimi do të kundërshtohet para Gjykatës Kushtetuese apo si do të zbatohet në praktikë nga policia.