Prishtina mbetet pa ndërmarrjen "Pastrimi": 32 vota pro, por vendimi rrëzohet

Seanca e jashtëzakonshme e Kuvendit Komunal të Prishtinës, e mbajtur më 11 shtator 2026, përfundoi pa vendim për një nga çështjet më të ndjeshme të kryeqytetit: menaxhimin e mbeturinave. Propozim-vendimi për themelimin e Ndërmarrjes Publike Lokale "Pastrimi" mori 32 vota pro, por nuk arriti numrin e nevojshëm për t'u miratuar.

Propozimi ishte paraqitur javën e fundit nga qeverisja e kryetarit Përparim Rama, e arsyetuar me nevojën për krijimin e kapaciteteve të reja komunale për largimin e mbeturinave. Në sallë, Rama e lidhi kërkesën me një financim që, sipas tij, kryeqyteti e ka humbur.

"Prishtina e ka humbur mundësinë për 74.1 milionë euro investime, sepse nuk ka nënshkruar Hekuran Murati, Vetëvendosja. Prandaj po kërkojmë themelimin e ndërmarrjes së re 'Pastrimi', e cila menaxhohet nga kryeqyteti 100%. Prishtina ka nevojë për kapacitetet e veta, për makineritë e veta, për planifikim sipas nevojave të lagjes", tha Rama, duke i atribuar mosnënshkrimin ministrit në detyrë të Financave, Hekuran Murati.

Pas fjalimit, kryetari u largua nga salla. Diskutimi vazhdoi mes përplasjeve të ashpra ndërmjet qeverisjes dhe opozitës.

Shefi i grupit të asamblistëve të Lëvizjes Vetëvendosje, Gëzim Sveçla, e kundërshtoi propozimin duke pretenduar se qëllimi i qeverisjes nuk është zgjidhja e problemit të mbeturinave, por krijimi i hapësirës për përfshirjen e operatorëve privatë në sistemin e menaxhimit. "Nuk e keni ju mendjen me e pastru qytetin, ju e keni mendjen me e gjetë një arsyetim për kohë shtesë për të inkorporuar në sistem të menaxhimit operatorë privatë", deklaroi Sveçla.

Nënkryetarja e Prishtinës, Besianë Musmurati, iu kundërpërgjigj duke e kthyer debatin te financimi i pretenduar: "Ministri yt, Hekuran Murati, nuk po e nënshkruan kredinë për me e fuqizu ndërmarrjen".

Edhe pse nuk ndodhej në sallë në momentin e votimit, Rama reagoi më pas në rrjetet sociale, duke e akuzuar Vetëvendosjen për "sabotim të pastrimit të Prishtinës". "Me votën tuaj e latë qytetin në bërllog, lagjet ku jetoni vetë, rrugët ku ecin fëmijët tuaj, familjet tuaja. Krejt qytetarët e Prishtinës i lini në bërllog", shkroi ai, duke e cilësuar të papërgjegjshme edhe sjelljen e asamblistëve gjatë seancës.

Sipas planit të paraqitur nga Rama, ndërmarrja e re do të menaxhohej tërësisht nga Komuna dhe do të kishte kapacitete të veta, përfshirë makineri dhe planifikim të shërbimeve sipas nevojave të lagjeve.

Pretendimi për humbjen e 74.1 milionë eurove nga Qeveria gjermane mbetet i paverifikuar, pasi Ministria e Financave nuk është përgjigjur ndaj pyetjeve të dërguara nga KALLXO.com.

Debati zhvillohet në një kohë kur Prishtina është përballur sërish me grumbullim të shtuar të mbeturinave në pjesë të ndryshme të qytetit gjatë javëve të fundit, përfshirë ditët e nxehta të verës. Problemet me largimin dhe menaxhimin e mbeturinave e kanë shoqëruar kryeqytetin gjatë gjithë vitit të kaluar dhe këtij viti, duke prodhuar ankesa të vazhdueshme të qytetarëve dhe përplasje politike në Kuvendin Komunal.