AdvertisementAd space
AdvertisementAd space
Reklamë
Mbledhja e Kryetarëve të Gjykatave të Shqipërisë del me një qëndrim të prerë: pagat e gjyqtarëve dhe të administratës gjyqësore duhet të procedohen menjëherë, ndërsa vendimi i Gjykatës Kushtetuese, thonë ata, nuk mund të zbatohet në mënyrë selektive.
Gjyqtarët dhe punonjësit e administratës gjyqësore në Shqipëri vazhdojnë të punojnë pa marrë pagat, dhe kreu i gjykatave e ka quajtur këtë gjendje të papranueshme. Në mbledhjen e mbajtur më 8 shtator 2026, Mbledhja e Kryetarëve të Gjykatave të Republikës së Shqipërisë shqyrtoi pasojat e mosprocedimit të pagave dhe kërkoi zhbllokimin e tyre pa vonesë, si dhe zbatimin e vendimit nr. 15/2026 të Gjykatës Kushtetuese.
"Paga për punën e kryer nuk është favor. Është detyrim", thuhet në deklaratën e kryetarëve të gjykatave. Sipas tyre, situata është veçanërisht e pajustifikueshme për administratën gjyqësore, punonjësit e së cilës nuk janë palë në debatin mbi formulën e pagës së magjistratëve, por kanë kryer dhe vazhdojnë të kryejnë detyrën pa u paguar. Reagimet e shfaqura gjatë ditës, thonë kryetarët, janë tregues i tensionit që ka prodhuar mospagimi.
Mbledhja e Kryetarëve deklaron se e mbështet kërkesën e ligjshme të punonjësve për të marrë pagat që u takojnë, por paralajmëron se kjo nuk duhet kuptuar si legjitimim i formave të reagimit që cenojnë vijimësinë e funksionimit të gjykatave. Shqetësimi duhet dëgjuar, thuhet në qëndrim, funksionimi i drejtësisë duhet garantuar dhe pagat duhet të procedohen pa vonesë.
Kryetarët e gjykatave i përgjigjen edhe pohimit të bërë në debatin publik se gjyqtarët ose organet e qeverisjes së sistemit gjyqësor ua kanë rritur pagat vetes. Ky pohim, sipas tyre, nuk pasqyron thelbin juridik të çështjes: gjyqësori nuk po kërkon të caktojë vetë pagën e tij, por respektimin e një vendimi përfundimtar të Gjykatës Kushtetuese, i cili ka rikonfirmuar pagën që nga viti 2016.
Në qendër të konfliktit qëndron vendimi nr. 15, datë 17.02.2026, i Gjykatës Kushtetuese, të cilin kryetarët e gjykatave e cilësojnë përfundimtar dhe të detyrueshëm. Ata i referohen edhe deklaratës publike të vetë Gjykatës Kushtetuese të 7 shtatorit 2026, e cila ritheksoi se arsyetimi dhe dispozitivi i vendimit përbëjnë qëndrimin e saj zyrtar dhe duhet të lexohen e zbatohen në tërësinë e tyre, ndërsa respektimi i vendimeve të saj është kërkesë e drejtpërdrejtë e rendit kushtetues. Prandaj, thonë kryetarët, vendimi nuk mund të lexohet në mënyrë të fragmentuar dhe as të zbatohet në mënyrë selektive.
Gjykata Kushtetuese i kishte lënë Kuvendit afat deri më 31 korrik 2026 për miratimin e ndryshimeve ligjore, duke përcaktuar se efektet e shfuqizimit hyjnë në fuqi me ligjin e ri dhe, "në çdo rast, jo më vonë se data 31.07.2026". Afati përfundoi pa u miratuar ligji. Nga 1 gushti 2026 gjyqtarët kanë vazhduar ta ushtrojnë funksionin, ndaj, sipas kryetarëve, detyrimi i shtetit për t'i paguar nuk mund të konsiderohet i mbyllur më 31 korrik dhe mosveprimi i ligjvënësit nuk mund të shërbejë si arsye për rikthimin te një rregullim, efektet e shfuqizimit të të cilit Kushtetuesja i ka përcaktuar shprehimisht në kohë.
Qëndrimi rikujton se vetë ekzekutivi ka deklaruar se vendimi i Gjykatës Kushtetuese do të zbatohet. Edhe për pagesat e prapambetura, thonë kryetarët, vendimi është i qartë: paragrafi 110 përcakton se, nëse ndryshimet ligjore nuk bëheshin deri më 31 korrik 2026, llogaritja e tyre do të kryhej me formulën që i referohet funksionarit të administratës së lartë publike, sipas vendimit nr. 35/2022 të Gjykatës Kushtetuese.
Për mënyrën dhe afatin e shlyerjes së detyrimeve të prapambetura, Mbledhja e Kryetarëve pranon se mund të përcaktohet një "skemë e arsyeshme përshtatjeje", por këmbëngul se vetë detyrimi nuk mund të vihet në diskutim: pagesat duhet të përllogariten dhe shlyerja e tyre duhet të fillojë.
Konflikti mbi pagat po zhvillohet ndërkohë që Tirana ka javë me tensione politike dhe protesta në rrugë, duke e kthyer bllokimin financiar të gjyqësorit në një përplasje mes pushteteve mbi zbatimin e një vendimi kushtetues.
Ministri i Brendshëm i Shqipërisë, Besfort Lamallari, ka dhënë dorëheqjen dhe në krye të dikasterit është emëruar Ervin Demo. Është dorëheqja e dytë e një ministri brenda një kohe të shkurtër, pas largimit të ministres së Shëndetësisë, Evis Sala.
