Pesë prokurorë në garë për krye të Prokurorisë Speciale kundër krimit të organizuar në Shkup

Gara për postin më të ndjeshëm në luftën kundër krimit të organizuar dhe korrupsionit në Maqedoninë e Veriut ka hyrë në fazën e parë të filtrimit. Këshilli i Prokurorëve ka formuar komisionet që do të zhvillojnë procedurën për zgjedhjen e shefit të ri të Prokurorisë Themelore për Ndjekjen e Krimit të Organizuar dhe Korrupsionit, ku janë paraqitur pesë kandidatë.

"Këta pesë kandidatë tani komisioni i shqyrton nëse i përmbushin ose jo kushtet në përputhje me ligjin dhe sipas shpalljes; dhe do t'i publikojnë në ueb-faqe në afat prej tre ditësh", tha kryetari i Këshillit të Prokurorëve, Bashkim Besimi.

Kandidaturat i kanë dorëzuar prokurori i lartë Jove Cvetanovski, prokurori në Prokurorinë e Lartë dhe ish-prokuror i PSP-së, Trajçe Pelivanov, prokurorja e PTHP-së Shkup, Lidija Raiçeviq, si dhe dy prokurorë të vetë PTHP NKOK-së, Iskra Haxhi-Vasileva dhe Faton Azizi.

Kriteret janë të përcaktuara: të drejtë kandidimi kanë prokurorët publikë me së paku gjashtë vjet përvojë të pandërprerë në funksionin e prokurorit deri në momentin e aplikimit dhe me vlerësim pozitiv në tri vitet e fundit. Dita e zgjedhjes është caktuar për 28 tetor.

Procedurën e ka nxitur skadimi i mandatit të drejtuesit aktual të kësaj prokurorie, Islam Abazi, i cili u zgjodh në këtë detyrë në tetor të vitit 2022.

Mbi procesin rëndon edhe një çështje disiplinore. I pyetur nëse do të ankohet ndaj vendimit për ndërprerjen e procedurës disiplinore ndaj njërit prej kandidatëve, kryeprokurori Nenad Saveski u përgjigj: "E kam pranuar vendimin dhe mendoj se kam dhënë tashmë qëndrim për këtë, nuk do të parashtroj, respektivisht ka skaduar afati për parashtrimin e ankesës". Nuk është bërë e ditur se për cilin nga pesë kandidatët bëhej fjalë.