"Mirë se vini, Kosovë": Mladenov dhe senatorja Ernst përshëndesin FSK-në për Gazën

"Mirë se vini, Kosovë!" Me këto fjalë Përfaqësuesi i Lartë i Bordit të Paqes për Gazën, bullgari Nickolay Mladenov, ka mirëpritur përfshirjen e Forcës së Sigurisë së Kosovës në Forcën Ndërkombëtare të Stabilizimit për Gazën.

Në një reagim në platformën X, Mladenov ka shprehur mirënjohje për Kosovën dhe e ka cilësuar kontributin e saj si angazhim për zbatimin e Planit Gjithëpërfshirës. "Mirënjohës ndaj Kosovës për bashkimin me Forcën Ndërkombëtare të Stabilizimit për Gazën. Kontributi juaj është një angazhim i qartë për zbatimin e Planit Gjithëpërfshirës. Mirë se vini, Kosovë!", ka shkruar ai.

Reagimi i tij erdhi një ditë pasi në Prishtinë u nënshkrua marrëveshja me të cilën FSK-ja bëhet zyrtarisht pjesë e këtij misioni. Vetë Forca e Sigurisë së Kosovës e kishte bërë të ditur përfshirjen të hënën.

Mbështetje publike ka ardhur edhe nga Uashingtoni. Senatorja e Shteteve të Bashkuara të Amerikës, Joni Ernst, përmes një postimi ka përshëndetur vendimin e Kosovës, duke theksuar rëndësinë e bashkëpunimit mes aleatëve dhe partnerëve për ndërtimin e një të ardhmeje më të sigurt dhe më stabile.

"Përshëndes Kosovën për bashkimin me Forcën Ndërkombëtare të Stabilizimit në Gaza. Aleatët dhe partnerët e fortë që punojnë së bashku ndërtojnë një të ardhme më të sigurt dhe më stabile për të gjithë. Faleminderit, Kosovë, që iu përgjigjët thirrjes", ka shkruar Ernst.

Numri i pjesëtarëve të FSK-së që do të angazhohen dhe afati i nisjes së tyre nuk janë bërë publikë.