Kosova ende pa përgjigje: çfarë kërkohet për anëtarësimin në Këshillin e Evropës?

Kosova ende nuk e di saktësisht çfarë duhet të plotësojë që kërkesa e saj për anëtarësim në Këshillin e Evropës të arrijë para Komitetit të Ministrave, trupës që mban në dorë vendimin përfundimtar. Këtë e pranon vetë Ministria e Punëve të Jashtme dhe Diasporës (MPJD), dy vjet e gjysmë pasi procesi u ndal në hapin e fundit.

Në një përgjigje me shkrim për gazetën KOHA, ministria bën të ditur se po komunikon me shtetet partnere për të sqaruar qëndrimet dhe kërkesat e tyre, në mënyrë që aplikimi të ecë përpara. "Përmes këtyre konsultimeve po punohet për adresimin e shqetësimeve të ngritura dhe për sigurimin e mbështetjes së nevojshme për avancimin e procesit. Në këto komunikime, Kosova i referohet opinionit pozitiv të Asamblesë Parlamentare si bazë të rëndësishme për vendimmarrjen e mëtejshme", thuhet në përgjigjen e MPJD-së.

Rruga deri këtu ka qenë e gjatë. Kosova aplikoi për anëtarësim në maj të vitit 2022. Dy vjet më vonë, Asambleja Parlamentare e Këshillit të Evropës dha rekomandim pozitiv, por çështja nuk u fut në agjendën e Komitetit të Ministrave. Atëherë, si kusht për këtë hap u paraqit dërgimi në Gjykatën Kushtetuese i draftstatutit të propozuar nga BE-ja për Asociacionin e komunave me shumicë serbe. A vlen ende ky kusht, ministria nuk e sqaroi.

Një tjetër pikëpyetje varet mbi takimin e radhës të Komitetit të Ministrave, që do të mbahet më 12 maj në Mal të Zi. Nga Këshilli i Evropës nuk treguan nëse anëtarësimi i Kosovës do të jetë pjesë e diskutimeve.

Ministria këmbëngul se anëtarësimi do të forconte mbrojtjen e të drejtave të qytetarëve, përfshirë komunitetet joshumicë. "Ai do të krijonte gjithashtu mundësi më të fuqishme për monitorim, llogaridhënie dhe adresimin e shqetësimeve për të drejtat e njeriut. Pikërisht për këtë arsye, anëtarësimi paraqitet si një hap që do të ndihmonte në trajtimin e shqetësimeve të partnerëve dhe në forcimin e besimit ndërmjet komuniteteve", shkruan MPJD.

Opozita e sheh ndryshe mënyrën si Ekzekutivi e ka trajtuar procesin. Deputetja e PDK-së, Ariana Musliu-Shoshi, thotë se qeveria nuk i është qasur çështjes me seriozitet. "Janë zotuar që do ta zbatojnë asociacionin, të cilin vetë është pranuar nga kjo qeveri e konkretisht nga z. Kurti në marrëveshjen e Ohrit. Nuk kanë kërkuar asgjë çka kjo qeveri nuk ka pranuar dhe nuk kanë kërkuar asgjë që Albin Kurti nuk ka pranuar", tha ajo.

Deputetja e Aleancës, Time Kadrijaj, kërkon angazhim maksimal që kërkesa e Kosovës të pranohet, por paralajmëron kundër vendimeve të nxituara. "Qeveria e Kosovës nuk duhet të bëjë hapa të ngutshëm, nuk duhet të bëjë politikë me të ardhmen e shtetit. Prioritet duhet të jetë shteti e jo ato veprimet populiste që shkojnë në favor të partisë së tyre", deklaroi Kadrijaj.