Konjufca për nderimet ushtarake ndaj Mlladiqit: Akt i turpit të thellë moral dhe politik

Nderimet ushtarake për Ratko Mlladiqin, kriminel lufte i dënuar për gjenocid, kanë nxjerrë një reagim të ashpër nga Prishtina zyrtare. Ministri i Punëve të Jashtme i Kosovës, Glauk Konjufca, ka shkruar në rrjetin social "X" se ajo që bëri Beogradi pas vdekjes së Mlladiqit është "një akt i turpit të thellë moral dhe politik".

"Nderimi i një krimineli lufte të dënuar, krimet e të cilit u përshkruan nga një gjykatë ndërkombëtare si “ndër më të urryerat e njohura për njerëzimin”, është një akt i turpit të thellë moral dhe politik. Nderimet ushtarake që iu dhanë Ratko Mlladiqit, së bashku me pjesëmarrjen e ministrave të qeverisë në detyrë në nderimin e tij, janë një akt i glorifikimit institucional të një njeriu të dënuar për gjenocid", shkroi Konjufca.

Ministri e lidh drejtpërdrejt këtë ceremoni me trashëgiminë politike të viteve '90. "Kjo është zgjedhja që bëri Beogradi sot. Kjo zgjedhje flet gjithashtu për një vazhdimësi më të thellë politike. Serbia udhëhiqet sot nga Aleksandar Vuçiq, i cili shërbeu si ministër i Informacionit në regjimin e Millosheviqit", theksoi ai.

Sipas Konjufcës, shteti serb vazhdon t'u japë hapësirë figurave dhe rrëfimeve të së kaluarës. "Dekada më vonë, shteti serb vazhdon t’u japë legjitimitet figurave dhe narrativave të rrënjosura në të njëjtën politikë të spastrimit etnik, zgjerimit territorial dhe mizorive masive që shkatërruan rajonin tonë në vitet ’90. Nderimi i Mlladiqit përmes institucioneve shtetërore tregon se sa nga ajo trashëgimi politike Serbia ende refuzon të përballet. Për Republikën e Kosovës, ky nuk është një debat abstrakt rreth historisë", shkroi ministri.

Ai e vendos reagimin e Kosovës mbi përvojën e luftës. "Populli ynë mbart kujtimin e masakrave, civilëve dhe fëmijëve të vrarë, dëbimeve masive dhe dhunës sistematike të kryer nga forcat shtetërore serbe. Prandaj, ne hedhim poshtë pa mëdyshje çdo përpjekje për të transformuar krimet e vërtetuara gjyqësorisht në çështje të interpretimit kombëtar, ose autorët e dënuar në figura të denja për nder", u shpreh Konjufca.

Në pjesën e fundit të postimit, ministri shprehu solidaritet me viktimat e Srebrenicës: "Gjenocidi nuk fiton një kuptim tjetër me kalimin e kohës dhe mohimi nuk mund ta fshijë dinjitetin e atyre që u vranë, u persekutuan dhe u dëbuan. Ne qëndrojmë me popullin boshnjak, me viktimat dhe të mbijetuarit e Srebrenicës dhe me të gjitha familjet, vuajtjet e të cilave nuk mund të pajtohen kurrë me lavdinë e atyre që janë përgjegjës për të."

Konjufca e mbyll reagimin me një mesazh drejtuar perspektivës evropiane të rajonit: "Nuk mund të ketë pajtim të vërtetë pa të vërtetën dhe asnjë të ardhme të besueshme evropiane të ndërtuar mbi nderimin e autorëve të krimeve që tronditën ndërgjegjen e njerëzimit."