Haziri: LDK-ja voton këdo që propozon Vetëvendosja për kryetar të Kuvendit

Kandidati i Lëvizjes Vetëvendosje për kryetar të Kuvendit do të ketë edhe votat e Lidhjes Demokratike të Kosovës, pavarësisht se kush propozohet. Këtë e ka bërë të ditur nënkryetari i LDK-së, Lutfi Haziri, në emisionin "Politiko" të Kanal 10, para seancës së pritur nesër.

Haziri e ka lidhur qëndrimin e tij me nevojën për marrëveshje mes subjekteve politike. "Unë jam kanë pro marrëveshjeve dhe bashkëpunimit, të koordinimit sa ma të mirë. Kështu që nesër, natyrshëm, duhet me kalu kandidati i VV-së për kryetar të Kuvendit, kushdo që është, dhe nënkryetarët që vijnë nga secila parti", ka deklaruar ai.

Sipas tij, votimi i kandidatit të Vetëvendosjes është pjesë e bashkëpunimit dhe e koordinimit institucional mes partive. Emri konkret që Vetëvendosja do ta nxjerrë për këtë post nuk është bërë i njohur.