Përplasje Ramës dhe Ministrisë së Financave: "Pastrimi" pa grantin gjerman

Prishtina do të përpiqet t'i zgjidhë vetë mbeturinat, pa parat gjermane. Kryetari i kryeqytetit, Përparim Rama, njoftoi se është marrë vendim për krijimin e Ndërmarrjes Komunale të Pastrimit, pasi, sipas tij, granti i Qeverisë së Gjermanisë për Kompaninë Rajonale të Mbeturinave "Pastrimi" dështoi.

"Prandaj kemi marrë vendim që të krijojmë Ndërmarrjen Komunale të Pastrimit! Do t'i përdorim krejt kompetencat që i kemi si Kryeqytet për ta zgjidhur këtë problem vetë. Pa pritur pafund. Situata me mbeturinat është e rëndë dhe qytetarët me të drejtë kërkojnë zgjidhje. Dhe zgjidhje do të bëjmë. Menjëherë. Me urgjencë, në seancën e radhës të Kryeqytetit", shkroi Rama në rrjetin social Facebook. Data e seancës së radhës nuk është bërë e ditur.

Arsyen e dështimit Rama e vendos tërësisht mbi Ministrinë e Financave dhe ministrin në detyrë të Financave, Hekuran Murati, të cilin akuzon se nuk e nënshkroi marrëveshjen e financimit.

"Atë që po e them tash e sa kohë, sot fatkeqësisht po e konfirmojnë edhe partnerët tanë ndërkombëtarë. KfW ka njoftuar se granti për 'Pastrimin' dështoi sepse Ministria e Financave nuk e nënshkroi Marrëveshjen e Financimit. Kaq!", deklaroi kryetari i Prishtinës, duke iu referuar njoftimit të institucionit ndërkombëtar financiar KfW.

Në një ton të mprehtë, Rama e cilësoi situatën poshtëruese përballë donatorëve. "E kemi ndihmën e Qeverisë gjermane. E kemi partnerin. E kemi projektin. E kemi nevojën urgjente. Por Hekuran Murati nuk e nënshkruan. Është e rëndë dhe e turpshme që para partnerëve tanë ndërkombëtarë duhet të shpjegojmë pse një projekt kaq i rëndësishëm për qytetarët tanë po dështon për shkak të Qeverisë sonë. Por, qytetarët nuk mund t'i lëmë të paguajnë çmimin e këtyre bllokadave", thotë ai.

Akuza mbetet e njëanshme: nuk ka reagim publik nga Murati, nga Ministria e Financave, nga KfW-ja e as nga Qeveria gjermane për arsyet e mosnënshkrimit të Marrëveshjes së Financimit. Po ashtu nuk është bërë publike vlera e grantit të humbur, e as çka do të ndodhë me projektin e paraparë për "Pastrimin", kompaninë rajonale të mbeturinave që mbulon kryeqytetin.