Gjykata Supreme i hap rrugë Trumpit të kufizojë votimin me postë para zgjedhjeve

Pengesa e fundit ligjore ndaj njërit prej dekreteve më të kontestuara të presidentit amerikan ra: Gjykata Supreme e Shteteve të Bashkuara anuloi vendimin gjyqësor që i ndalonte administratës së Donald Trumpit të zbatonte urdhrin ekzekutiv për kufizimin e votimit me postë. Vendimi vjen para zgjedhjeve për Kongres të nëntorit, të cilat do të përcaktojnë se cila parti do ta kontrollojë atë dhomë.

Gjyqtarët pranuan kërkesën urgjente të Ministrisë së Drejtësisë për pezullimin e përkohshëm të bllokadës së vendosur në qershor nga gjyqtarja amerikane Indira Talwani nga Bostoni. Ajo ia kishte ndaluar administratës Trump zbatimin e dekretit në 23 shtete federale, të drejtuara në shumicën e tyre nga demokratët, si dhe në Uashington D.C., të cilët kishin nisur padi për ta ndaluar atë.

Gjykata Supreme ka një shumicë konservatore prej gjashtë ndaj tre. Tre gjyqtarët liberalë kundërshtuan vendimin. Vendimi u lë të hapur shteteve mundësinë që të paraqesin sërish padi në muajt në vijim, ndërsa afrohen zgjedhjet për Kongres.

Urdhri ekzekutiv, i nxjerrë në mars, i ngarkoi Ministrisë së Sigurisë Kombëtare hartimin dhe dërgimin te shtetet të një liste të shtetasve amerikanë që kanë të drejtë vote në secilin shtet federal. Ministrisë së Drejtësisë iu urdhërua t'u japë përparësi hetimeve dhe ndjekjes penale ndaj zyrtarëve zgjedhorë shtetërorë dhe lokalë që u lëshojnë fletëvotime personave për të cilët konsiderohet se "nuk kanë të drejtë" të votojnë në zgjedhjet federale.

Dekreti parashikon gjithashtu që shërbimi postar amerikan t'u dërgojë fletëvotime vetëm votuesve që gjenden në listën e miratuar të votuesve me postë në secilin shtet. Shërbimi postar ka ndërmarrë kohët e fundit hapa për zbatimin e këtij urdhri.

Trump ka premtuar se para zgjedhjeve për Kongres do ta heqë në nivel kombëtar përdorimin e fletëvotimeve që dërgohen me postë dhe prej kohësh e vë në dyshim sigurinë e kësaj forme të votimit, ndonëse dëshmitë për mashtrime zgjedhore janë të rralla. Presidenti amerikan ka bërë pohime të pasakta për mashtrime të përhapura zgjedhore, përfshirë humbjen e tij nga demokrati Joe Biden në vitin 2020.

Pesha politike e vendimit është e drejtpërdrejtë. Republikanët po përpiqen ta ruajnë kontrollin mbi Kongresin në zgjedhje me rezultat shumë të pasigurt, ndërsa kufizimi i votimit me postë do t'u shkonte atyre për shtat, pasi votuesit demokratë tradicionalisht e kanë përdorur më shpesh këtë mënyrë votimi.

Urdhri ekzekutiv është pjesë e përpjekjeve më të gjera të Trumpit për ndryshime rrënjësore në sistemin zgjedhor amerikan. Paralelisht, ai po ushtron presion mbi Kongresin e kontrolluar nga republikanët që të miratojë paketën e kontestuar të kufizimeve të së drejtës së votës, të njohur si "SAVE America Act".