Gjashtë vota ndajnë Kosovën nga presidenti: thirrje për kompromis ose zgjedhje të reja

Gjashtë vota. Kaq i ndajnë sot institucionet e Kosovës nga zgjedhja e një presidenti të ri, dhe pikërisht ato gjashtë vota po e shtyjnë vendin drejt një bllokade të re institucionale.

Lëvizjes Vetëvendosje i duhen edhe gjashtë vota për ta zgjedhur presidentin e ri. Partia Demokratike, Aleanca dhe gjashtë deputetë të LDK-së janë deklaruar se nuk do të ofrojnë kontribut në këtë drejtim. Në mungesë të kuorumit të nevojshëm për çështjen e shefit të shtetit, nga 5 tetori vendi mbetet edhe pa president.

Njohës të politikës kërkojnë tani që partitë të vendosin sa më shpejt: ose kompromis për zgjedhjen e presidentit, ose shpallje e zgjedhjeve të reja. Sipas tyre, çdo vonesë në formimin e institucioneve para tetorit do t'i kushtojë vendit me pasoja të reja institucionale e politike.

"Kjo zgjedhje e këtij presidenti duhet të bëhet para datës 4-5 tetor. Në rast se nuk ndodh kjo, kjo është situatë e paprecedentë, e rrezikshme, sepse cenon sigurinë kombëtare të Kosovës. Për herë të parë ndodh që një shtet në Bashkimin Evropian të funksionojë pa asnjë titullar…", ka thënë Vullnet Bugaqku, hulumtues i lartë në Institutin Demokratik të Kosovës.

Rrugëdalja që propozon Naim Jakaj, hulumtues i lartë i Institutit të Kosovës për Drejtësi, kalon te kutitë e votimit. "Kur ky debat të shterrohet, Kosova le të shkojë në zgjedhje dhe u.d. e presidentes të caktojë një datë sa më shpejt për mbajtjen e zgjedhjeve, në mënyrë që deri para datës 5 tetor ta kemi një Kuvend të ri, qeveri të re dhe një president që është legjitim dhe legal, që votohet nga Kuvendi i Kosovës. Në këso rrethanash, pas datës 5 tetor ne shkojmë në anarki kushtetuese, nuk do të ketë as kush t'i thërrasë partitë për konsensus", tha ai.

Kostoja e ngërçit tashmë po numërohet në para: zvarritja e formimit të institucioneve i ka humbur Kosovës dhjetëra miliona euro nga Plani i Rritjes, ndërsa vlerësohet se bllokada politike do ta dëmtojë edhe më shumë vendin.

"Ndërkohë pasojat do të jenë të rënda, siç e përmenda. Financat nga plani i rritjes, financat nga plani i brendshëm, çështjet që lidhen me diplomacinë, shërbimin e jashtëm, me lobimin e Kosovës për aplikim për anëtarësim në Këshillin e Evropës dhe organizata të tjera, veçanërisht në Bashkimin Evropian", shtoi Jakaj.