Aleanca bojkoton seancën, Gjini flet për Kushtetuesen: Kuvendi vazhdon me votat për kryeparlamentar

Një bankë e zbrazët do të bjerë në sy sot në sallën e Kuvendit të Kosovës. Aleanca ka konfirmuar se nuk do të marrë pjesë në seancën konstituive, e cila vijon më 9 shtator nga ora 11:00, me zgjedhjen e kryetarit dhe të nënkryetarëve të Kuvendit në rend dite.

Vendimi për bojkot u shpall pas mbledhjes së kryesisë së partisë. Kreu i Aleancës, Ardian Gjini, ka thënë se ky ka qenë qëndrimi i përgjithshëm i partisë dhe se vetëm një anëtar i kryesisë kishte mendim ndryshe.

Gjini ka shtuar se Kuvendi mund të konstituohet edhe sot, por nëse kjo ndodh pa u respektuar ajo që Aleanca e konsideron si procedurë kushtetuese, çështja mund të përfundojë në Gjykatën Kushtetuese.

Në rrafshin e kandidaturave, Vetëvendosje pritet të rikandidojë Albulena Haxhiun për kryeparlamentare. PDK-ja pritet të propozojë Vlora Çitakun për nënkryetare, ndërsa LDK-ja Kujtim Shalën për nënkryetar.

Seanca zhvillohet në një situatë politike të ndërlikuar, pasi ende nuk është e qartë nëse do të sigurohen votat e nevojshme për president. Disa analistë dhe njohës të çështjeve kushtetuese e kanë vlerësuar mbledhjen si të parakohshme dhe si veprim politik të partisë në pushtet.