Afati 30-ditor u tejkalua: KDI kërkon nga Kushtetuesja përgjigje për Kuvendin

Afati prej 30 ditësh që Gjykata Kushtetuese ua kishte vënë deputetëve për ta përfunduar seancën konstituive të Kuvendit ka kaluar pa u zbatuar dhe pikërisht kjo, sipas Institutit Demokratik të Kosovës (KDI), ka krijuar një pikëpyetje juridike që askush nuk i ka dhënë përgjigje ende: çfarë vlere kanë veprimet e një Kuvendi që konstituohet pas skadimit të afatit?

KDI vlerëson se konstituimi i Kuvendit mbetet i domosdoshëm për funksionimin e institucioneve dhe për tejkalimin e krizës institucionale, por thekson se tejkalimi i afatit kushtetues ka hapur një çështje të re juridike. Organizata i është drejtuar Gjykatës Kushtetuese për qartësi lidhur me pasojat juridike të këtij tejkalimi dhe me vlefshmërinë e veprimeve që mund të ndërmerren pas konstituimit.

Instituti rikujton përmbajtjen e aktgjykimit të Gjykatës Kushtetuese, sipas të cilit deputetët e zgjedhur duhet ta përfundojnë seancën konstituive "sa më shpejt dhe jo më vonë se tridhjetë (30) ditë", duke zgjedhur kryetarin dhe nënkryetarët e Kuvendit.

Për KDI-në, vija ndarëse është e qartë: subjektet politike dhe deputetët nuk mund ta përcaktojnë vetë kuptimin dhe efektin juridik të dispozitave kushtetuese apo të aktgjykimeve të Gjykatës Kushtetuese. "Për këtë arsye, u kërkojmë deputetëve dhe palëve të autorizuara që të kërkojnë qartësi mbi pasojat e tejkalimit të afatit 30-ditor, statusin juridik të konstituimit të Kuvendit pas skadimit të këtij afati dhe statusin e veprimeve që Kuvendi do të ndërmarrë pas konstituimit", thuhet në komunikatën e institutit.

Sipas KDI-së, çështja nuk duhet parë vetëm përmes prizmit të krizës aktuale, sepse ka peshë edhe për funksionimin e rendit kushtetues të Kosovës në të ardhmen. "Kjo çështje prek sigurinë juridike dhe stabilitetin institucional të vendit", vlerëson organizata, duke shtuar se një vendim i ri i Gjykatës Kushtetuese do t'u mundësonte deputetëve dhe institucioneve të veprojnë mbi një interpretim të përbashkët të detyrimeve të tyre.

Instituti e mbyll qëndrimin e vet me një dilemë që ia adreson politikës: qytetarët kanë nevojë për institucione funksionale, por njëkohësisht edhe për institucione që veprojnë brenda rendit kushtetues.