Zhdukur prej më shumë se një muaji: Policia kërkon ndihmën e qytetarëve për 78-vjeçarin

Më shumë se një muaj pas raportimit të zhdukjes së tij, Xhafer Raqi, 78 vjeç, mbetet i pagjetur. Pasi kërkimet me njësi hetimore dhe ekipe kërkim-shpëtimi nuk dhanë rezultat, Policia e Kosovës i është drejtuar tani qytetarëve për çdo informacion që mund të ndihmojë në gjetjen e tij.

Sipas Policisë, rasti u raportua më 2 korrik 2026 në Stacionin Policor Qendra në Prishtinë. Që nga ajo ditë, njësitet policore të hetimeve, Njësiti për Kërkim-Shpëtim i Forcës së Sigurisë së Kosovës dhe patrullat policore kanë ndërmarrë veprime për ta gjetur, në koordinim me prokurorinë përkatëse dhe në bashkëpunim të ngushtë me familjarët.

Në kuadër të hetimeve, thotë Policia, janë intervistuar persona që mund të kenë informacione lidhur me vendndodhjen e 78-vjeçarit dhe është bërë kontrollimi i hyrje-daljeve në të gjitha pikat kufitare. Kërkimet janë shtrirë edhe në zonat që ai i frekuentonte zakonisht, përfshirë ambiente të mbyllura dhe të hapura, ndërsa, sipas Policisë, është analizuar dhe hetuar çdo informacion që lidhet me të.

Pavarësisht këtyre veprimeve, 78-vjeçari ende nuk është gjetur. Pas marrjes së autorizimit nga prokurori i shtetit, Policia ka kërkuar ndihmën e publikut.

"Të gjithë ata që kanë çfarëdo lloj informacioni që ndërlidhet me personin e sipërshënuar, t'i përcjellin ato policisë përmes numrit 192 apo në info@kosovopolice.com, thuhet në njoftimin e Policisë.