Prishtina nën masa të jashtëzakonshme për 16 shtatorin, ditën e aktgjykimit në Hagë

Një ekip zjarrfikësish me kamion për fikjen e zjarrit duhet të jetë i pozicionuar më 16 shtator, nga ora 10:00, në parkingun e brendshëm të EULEX-it në Zonën Industriale të Prishtinës. Ky është vetëm një detaj i planit të gjerë operacional që Policia e Kosovës ka hartuar për ditën kur në Hagë pritet të shpallet aktgjykimi ndaj Hashim Thaçit, Kadri Veselit, Jakup Krasniqit dhe Rexhep Selimit.

Plani nis të veprojë një ditë më herët. Nga 15 shtatori ndërpriten pushimet vjetore për zyrtarët policorë që ndodhen brenda Kosovës, ndërsa kërkesat e reja për pushim nuk do të aprovohen. Nga mëngjesi i 16 shtatorit, një numër njësish kalojnë në orar dymbëdhjetëorësh.

Pesha kryesore bie mbi kryeqytetin. Në Prishtinë aktivizohen tri togje rezervë, të cilave u shtohen togje të tjera rezervë nga Gjilani, Ferizaji, Prizreni, Gjakova, Peja dhe Mitrovica e Jugut. Njësitë janë urdhëruar të jenë të pajisura me komplet pajisjet për menaxhimin e turmave. Në Prishtinë angazhohen edhe operatorë të NJRSH-së nga gjashtë rajone policore, ndërsa dokumenti përcakton procedurën që duhet ndjekur nëse këto njësi kanë nevojë të pajisen me gaz lotsjellës.

Një kapitull i veçantë u kushtohet objekteve të rëndësisë së veçantë dhe përfaqësive ndërkombëtare. Patrulla parashihen te Ambasada e Shteteve të Bashkuara, Zyra e BE-së, Zyra e Këshillit të Evropës, Rezidenca e Ambasadorit të BE-së, zyrat ndërlidhëse ruse, greke e rumune, si dhe te prokuroritë dhe gjykatat. Plani kërkon po ashtu shtim të patrullimeve në zonat me popullatë të përzier dhe angazhim maksimal të inteligjencës policore për mbledhjen e informacioneve.

Mobilizimi vjen në ditën kur Dhomat e Specializuara në Hagë pritet të shpallin aktgjykimin e shkallës së parë ndaj katër ish-krerëve të UÇK-së, të cilët mbeten të akuzuar derisa gjykata të vendosë. Në Prishtinë janë paralajmëruar edhe organizime publike lidhur me shpalljen e aktgjykimit.