Ndalohet në Opterushë me marihuanë, i riu i çon vetë hetuesit te sasia tjetër në shtëpi

Gjithçka nisi me një ndalim të zakonshëm në rrugë. Të shtunën, rreth orës 21:10, patrulla e Stacionit Policor në Rahovec ndaloi një 22-vjeçar në fshatin Opterushë të Rahovecit. Gjatë kontrollit, te i riu u gjetën 11.04 gramë substancë e dyshuar narkotike e llojit marihuanë, një grinder dhe dy pako rizlla.

I dyshuari u arrestua dhe u shoqërua në stacionin policor, ndërsa sendet e gjetura u sekuestruan si prova materiale. Në hetim u përfshinë edhe hetuesit e Drejtorisë për Hetimin e Trafikimit me Narkotikë në Gjakovë.

Pikërisht gjatë komunikimit me ta, rasti mori një kthesë. I ndaluari u tregoi hetuesve se në shtëpinë e tij kishte edhe një sasi tjetër narkotikësh dhe se ishte i gatshëm ta dorëzonte. Hetuesit shkuan në banesën e tij, ku gjetën një qese të zezë me rreth 27 gramë substancë tjetër të dyshuar si marihuanë, si dhe një numër të konsiderueshëm qesesh të vogla najloni të zbrazëta, të cilat u sekuestruan po ashtu si prova materiale.

Në total, policia ka sekuestruar rreth 38 gramë substancë të dyshuar narkotike, bashkë me grinderin, rizllat dhe qeset e vogla.

Për rastin është njoftuar prokurori kujdestar i Prokurorisë Themelore në Gjakovë, i cili ka lëshuar aktvendim për ndalimin e 22-vjeçarit. Hetimet vazhdojnë nën dyshimin për veprën penale "Blerja, posedimi, shpërndarja dhe shitja e paautorizuar e substancave narkotike".

I dyshuari prezumohet i pafajshëm derisa fajësia e tij të mos provohet me vendim të formës së prerë të gjykatës.