Zhdukja në Gjakovë: policia kërkon ndihmë për të gjetur 45-vjeçaren nga lagjja "Brekoc"

Policia e Kosovës ka nisur kërkimet për një grua 45-vjeçare nga Gjakova, që është raportuar e zhdukur, dhe u ka kërkuar ndihmë qytetarëve për ta lokalizuar.

Sipas njoftimit të Drejtorisë Rajonale të Policisë në Gjakovë, personi i zhdukur është Makfirete Kamer Avdylaj, e lindur më 18 shtator 1980, banore e lagjes "Brekoc" në Gjakovë.

Kërkesa për bashkëpunim me qytetarët dhe mediat është bërë me autorizim të prokurorit të shtetit, në kuadër të përpjekjeve për ta gjetur atë.

"Luten të gjithë qytetarët që kanë ndonjë informacion për vendndodhjen e personit të zhdukur apo çfarëdo të dhëne tjetër që mund të ndihmojë në gjetjen e saj, të njoftojnë menjëherë Policinë e Kosovës", thuhet në njoftimin e policisë.

Çdo informacion mund të raportohet në numrat pa pagesë 192 dhe 0800 19999, përmes adresës elektronike info@kosovopolice.com, si dhe përmes aplikacionit "Lajmëro Policinë".