Vuçiç i shkruan Rutte-s për urën e Ibrit dhe akuzon komandantin turk të KFOR-it

Beogradi ka zgjedhur rrugën e letrës për të ndalur hapjen e urës kryesore mbi lumin Ibër në Mitrovicë. Presidenti serb, Aleksandar Vuçiç, paralajmëroi në Beograd se do t'i shkruajë Sekretarit të Përgjithshëm të NATO-s, Mark Rutte, duke i kërkuar që ura të mos hapet për qarkullimin e automjeteve.

Paralajmërimi erdhi vetëm një ditë pasi Bashkimi Evropian konfirmoi se ishin plotësuar kushtet për hapjen e urës për makinat.

Vuçiç nuk e drejtoi kritikën te Brukseli, por te komandanti i KFOR-it, gjenerali Ozkan Ulutas, të cilin e akuzoi si autorin e planit. Duke iu referuar gjeneralit me prejardhjen e tij, presidenti serb tha:

"Këtë po e bën turku, komandanti i KFOR-it. Sot do t’i shkruaj Mark Rutes dhe shpresoj që t’i përgjigjet letrës sime dhe ta pranojë kërkesën time që kjo të mos bëhet. Për mua, ky është një turp i madh dhe një zhgënjim. Kjo na tregon se nervozizmi ka hyrë në radhët e tyre, nuk dinë se si ta detyrojnë Serbinë ta pranojë Kosovën e pavarur. Ne do të shohim se si t’i ndihmojmë popullit tonë. Ngadalë, gjërat po ndryshojnë në botë, por jo aq shpejt sa kemi pritur. Çdo ditë një popull keqtrajtohet, dëbohet nga vatrat e tij. Do të shohim se cila do të jetë përgjigjja e tyre."

Me këtë deklaratë, Vuçiç e lidhi çështjen e urës drejtpërdrejt me presionin ndaj Serbisë për ta pranuar Kosovën si shtet të pavarur, ndërsa la të kuptohet se hapat e mëtejshëm të Beogradit do të varen nga reagimi që do të marrë nga NATO. Ende nuk dihet nëse Rutte do t'i kthejë përgjigje kërkesës së presidentit serb.