Pushtet i ri në Beograd, i njëjti qëndrim për Kosovën: studentët nuk premtojnë kthesë

Pushteti në Serbi ndërroi duar pas 14 vjetësh, por për Kosovën nuk paralajmërohet ndonjë kthesë. Lista Studentore, fituese e zgjedhjeve, ka hedhur në programin e saj qëndrime që nuk largohen thelbësisht nga vija e deritanishme e Beogradit.

Në atë program, çështja e Kosovës trajtohet në përputhje me Kushtetutën e Serbisë dhe me Rezolutën 1244 të OKB-së, ndërsa theksi vihet te përmirësimi i pozitës së serbëve në Kosovë. Ilija Srdanoviq, i cili kryeson Listën Studentore, ka paralajmëruar vazhdimin e dialogut me Prishtinën dhe zbatimin e Marrëveshjes së Brukselit, por gjithnjë brenda kornizës së Kushtetutës serbe.

Në Konventën Kombëtare për Bashkimin Evropian, një nga zërat e shoqërisë civile në Serbi, nuk presin ndryshime të shpejta në dialog. "Nuk besoj se pas konstituimit të Kuvendit dhe formimit të Qeverisë do të ketë një dinamikë shumë të ndryshme. Mendoj se këto procese, veçanërisht kur flasim për dialogun, kanë arritur në një fazë ku do të vazhdojnë të mbeten në gjendjen aktuale, ndërsa vëmendja do të përqendrohet në çështje të tjera", ka thënë Bojana Sellakoviq nga kjo organizatë.

Pak më shumë shpresë, por po aq kujdes, shfaqet në Lëvizjen Evropiane në Serbi. Atje vlerësojnë se ndryshimi i pushtetit nuk garanton ndryshim të politikës ndaj Kosovës, por mund të hapë hapësirë për një qasje tjetër. "Kur bëhet fjalë për marrëdhëniet ndërmjet Beogradit dhe Prishtinës, nuk duhet pritur që rezultati zgjedhor, në vetvete, të sjellë një kthesë thelbësore. Megjithatë, shpresoj që ndryshimi i pushtetit të krijojë mundësinë që marrëdhëniet të ndërtohen përmes një dialogu të përgjegjshëm, respektimit të detyrimeve të marra dhe heqjes dorë nga politika e konfrontimeve të vazhdueshme", ka thënë Dragana Gjurica nga Lëvizja Evropiane në Serbi.

Bashkimi Evropian, nga ana e tij, ka rikujtuar se ndryshimi i pushtetit në Serbi nuk i fshin detyrimet e marra në dialog, përfshirë Marrëveshjen e Brukselit dhe Aneksin e Ohrit.

Pyetja kryesore mbetet e hapur: a do të sjellë qeveria e re në Beograd ndryshime konkrete në dialogun me Kosovën, apo do të ndjekë rrugën e trashëguar nga paraardhësit e saj?