Përmbyset mjeti sportiv në livadhet e Domajt: vdes 46-vjeçari nga Kosova, lëndohet vëllai

Një shtetas nga Kosova, 46 vjeç, ka humbur jetën pasi mjeti sportiv që po drejtonte dyshohet se u përmbys në livadhet e fshatit Domaj, në njësinë administrative Gjinaj të Hasit, në Shqipëri.

Në mjet ndodhej edhe vëllai i tij, 38 vjeç. Ai mbeti i lënduar dhe po merr ndihmë mjekësore në spitalin e Kukësit, ndërsa gjendja e tij shëndetësore nuk është bërë ende e ditur.

Përmbysja trajtohet si aksidentale, por rrethanat e saj mbeten të pasqaruara. Grupi hetimor po kryen veprimet për të zbardhur plotësisht se si ndodhi aksidenti.