Vrasja e shqiptarit të hedhur në pus në Itali: karabinierët arrestojnë një 29-vjeçar

Karabinierët italianë kanë arrestuar një burrë 29-vjeçar nga Cesena në kuadër të hetimit për vrasjen e D.M., shqiptarit 31-vjeçar, trupi i të cilit u gjet mëngjesin e 28 tetorit në një pus në Via Felloniche, në Longiano.

Arrestimi u krye me urdhër të Prokurorisë së Forlìt, e cila drejton hetimin. Moshën dhe vendbanimin e të arrestuarit i ka bërë të ditura televizioni rajonal italian TGR Emilia Romagna. Çfarë roli mund të ketë pasur 29-vjeçari në ngjarje ende nuk është sqaruar, dhe kjo pritet të përcaktohet nga hetimet e mëtejshme.

Sipas hetimeve fillestare, 31-vjeçari u godit nga plagë të shumta me armë zjarri dhe vdekja mund të ketë ndodhur po në mbrëmjen e 7 tetorit, kur ai doli nga shtëpia për të takuar një të njohur dhe nuk u kthye më. Disa gëzhoja të përdorura, të gjetura pranë vendit ku u zbulua trupi, janë nën ekzaminim nga hetuesit.

Hetuesit po përpiqen të rindërtojnë rrethanat e krimit, marrëdhëniet e viktimës me njerëzit që ai shoqëronte dhe orët që pasuan takimin e tij të fundit. Ndër hipotezat e para është edhe një problem i mundshëm financiar, por motivi i vrasjes mbetet ende i paqartë.