Vetëm 8.383 vende pune për të diplomuarit: tregu britanik në nivelin më të ulët në një dekadë

Numri i vendeve të punës të ofruara për të sapodiplomuarit në Britani ka rënë në nivelin më të ulët që prej se ka nisur matja para një dekade. Në korrik u shpallën vetëm 8.383 pozita për ata që largohen nga universiteti, një rënie prej 45 për qind krahasuar me të njëjtën periudhë të vitit të kaluar, sipas faqes së rekrutimit Adzuna, e cila i publikoi shifrat ditën e hënë. Është shifra më e ulët që nga viti 2016, kur kompania nisi mbledhjen e këtyre të dhënave.

Kontrasti me të kaluarën e afërt është i ashpër: në vitin 2017 tregu britanik ofronte më shumë se 55.000 pozita për të diplomuarit.

Rënia vjen pikërisht kur 262.820 persona përgatiten të nisin universitetin në shtator, një rekord i ri që e bën edhe më të vështirë hyrjen e brezit të ri në tregun e punës, në një kohë kur pozitat fillestare kërcënohen nga inteligjenca artificiale. Sipas Office for National Statistics, zyrës britanike të statistikave, rreth një milion të rinj në Britani nuk ishin as në arsim, as në punë, as në trajnim gjatë tremujorit të parë të këtij viti.

Adzuna tha se sektorë si kujdesi shëndetësor, infermieria, hoteleria dhe logjistika shpallën më pak vende pune dhe se shifrat tregojnë se rimëkëmbja e raportuar gjatë pranverës ka marrë kahje të kundërt. Të vetmit sektorë me rritje të ofertave për ata që dalin nga universiteti ishin udhëtimet, mësimdhënia dhe ndërtimi.

"Shifrat e korrikut janë një hap prapa, jo një lëkundje kalimtare. Rënia vjetore e vendeve të lira u përkeqësua për herë të parë që nga janari dhe (numri i) kërkuesve të punës për çdo vend të lirë tani është më i lartë se një vit më parë", tha Andrew Hunter, bashkëthemelues i Adzuna-s. "Tregu i punës për të diplomuarit vazhdon të vendosë nivele të reja minimale, gjë që na tregon se punëdhënësit ende nuk kanë gjetur një arsye për ta hapur punësimin në atë nivel."

Hunter shtoi se pamja nuk është krejtësisht e zymtë: "Nuk janë të gjitha lajme të këqija. Mësimdhënia, udhëtimet, tregtia dhe ndërtimi vazhdojnë të shtojnë vende pune, dhe tani po e bën të njëjtën gjë edhe prodhimi. Por kjo është një listë e shkurtër, dhe të gjithë ata jashtë këtyre sektorëve po e kanë më të vështirë sesa tre muaj më parë."

Punëdhënësit i kanë frenuar punësimet edhe përballë rritjes së kontributeve të sigurimeve kombëtare dhe të pagës minimale, të njoftuara nga ish-kancelarja Rachel Reeves në dy buxhetet e saj të fundit. Kostoja shtesë e punës për bizneset përkon me faktin se disa kompani po i japin përparësi investimeve në automatizim dhe në mjetet e inteligjencës artificiale në vend të punësimit.

Pasojat po ndihen te vetë të rinjtë. Një raport i Institute for Public Policy Research (IPPR) tha këtë verë se të rinjtë e moshës 16 deri 21 vjeç janë më pak të sigurt se do të kenë sukses sesa një dekadë më parë dhe se disa prej tyre po "humbin besimin te e ardhmja e tyre". Në korrik, Andy Burnham tha se do të përpiqet ta nxisë punësimin e të rinjve me mbështetje më të madhe për arsimin teknik dhe praktikat profesionale.